Human na ang eleksiyon. Panahon na nga ipunting sa mga mananaug ang ilang panglantaw sa kaayuhan sa ilang dapit ug sa ilang mga konstituwente. Kalimtan na usab unta ang politika.
Unang hatagan og pagtagad mao ang solusyon sa baha ug lunop dala sa kanunay nga pagbunok sa uwan. Kinahanglang pangandaman usab ang kabutangan sa mga tawo kon evacuation center nga apektado sa baha ug lunop.
Kinahanglang maghiusa ang tanan labi na ang mga politiko alang niining dakung gimbuhaton.
* * *
Daghang buot buhaton ni Cebu City Mayor Mike Rama alang sa taga siyudad sa Sugbo nga mag-agi pa sa "mata sa dagum."
Usa niini mao ang pagbaligya sa pipila ka luna sa South Road Properties (SRP) aron igasto sa pagpatuman sa comprehensive drainage program pagsulbad sa grabeng lunop ug baha kun mobunok ang kusog nga uwan. Apan songsungon kini kay supak man niini ang mga sakop sa Bando Osmeña - Pundok Kauswagan (BOPK) nga maoy mayoriya sa konseho.
Buot niyang tukuron pagbalik ang Carbon Market unit 2 aron mas hamugaway ang kabutangan sa mga tinda apan daw way interes niini ang iyang mga kaatbang sa politika.
Ang Bus Rapid Transit (BRT) hanap na ang katumanan. Dugay pa usab ang third link kon ang ikatulong dugtong tali sa mainland Cebu ug sa isla sa Mactan nga mao ang ikatulong taytayan o kaha tunnel.
Bisan gani ang reblocking kon pagpahimutang og maayo sa mga balay human sa sunog aron kini mabutangan og karsada nga sarang kaagian sa bombero ug ubang sakyanan panahon sa emerhensiya gibabagan pa sa mga kaatbang.
Kining pagpalit og kahimanan ug mga ekipo nga magamit sa pagsumpo sa kriminalidad sama sa CCTV camera ug ang pagtukod og command center aron maoy magamit panahon sa kalamidad gilisudlisud pa.
Makasabut na hinoon ang mga botante og unsay tinarong nga pagsupak sa mga pulitiko ug ang pagbabag lang gayud bisan sa maayong mga proyekto alang sa paglig-on sa ilang partido.
* * *
Aron pagmatuod nga tukma ang resulta sa Automated Elections System (AES) sa bag-o lang natapus nga piniliay ang Commission on Elections nihimo niining Random Manual Audit (RMA).
Kini nagpakita nga 99.9747 percent accuracy kon katukma ang resulta sa Precinct Count Optical Scan (PCOS).
Si Embahador Henrietta De Villa sa Parish Pastoral Council for Responsible Voting (PPCRV) maoy chairperson sa RMA committee uban kang Comelec Chairman Sixto Brillantes ug Commissioner Robert Lim. Apil niini ang 68 ka validators gikan sa Comelec, 22 ka RMA trainors ug 234 ka mga Comelec provincial supervisors isip mga coordinators. Si National Statistics Office (NSO) Administrator Carmelita Ericta mao ang nihimo sa analysis.
Alang sa pagpili og mga senador, ang nationwide average accuracy 99.9775 porsiyento. Pagka-kongresista 99.9719 porsiyento ug 99.9748 porsiyento katukma ang resulta sa pagpili og mga mayor.
Ang deperensiya sa resulta sa manual ug PCOS mao ang dili hustong pagbotar. Inay nga i-shade ila man hinoon nga gi-check ug ang uban gilinginan mao nga wala kini ipha sa PCOS apan giihap sa RMA.
Sumala ni De Villa nga very credible kon katuhuan kaayo ang resulta sa Mayo 13 nga piniliay.
Estudo na ba ang protesta sa BOPK batok kang Mayor Rama ug Bise Mayor Edgar Labella?
* * *
Email:msr1144@yahoo.com