Balik Eskwela

Andam na ang Department of Education kon DepEd sa pormal na usab nga pagbukas sa pagtungha sa atong mga estudyante alang sa pampubliko ug pribadong tunghaan. Gani sa milabay'ng semana ilahang gilusad ang Balik Eskwela program 2013 isip pagpangandam sa School Year 2013-2014.

Akong nakita sa maong programa ang bayanihan spirit sanglit ang mga ginikanan, magtutudlo ug pipila ka mga estudyante nagtambayayong aron masiguro nga hingpit nang andam ang mga tunghaan sa dihang kini mag bukas sa Hunyo 3, 2013.

Dili lamang DepEd, pinaagi sa mga maestra ug maestro ang subsob nga nangandam sa maong pagbukas sa klase. Ang atong mga kapolisan naghimo usab sa ilahang pagpangandam sanglit bagang duot sa mga estudyante unya ang magpanon sa ilahang tagsa-tagsa ka mga tunghaan.

Sa pikas bahin, dili lang ang  atong kapolisan ang  nagkapuliki  alang sa pagpangandam sa maong pagbukas sa klasi. Wa gyud magpaulahi ang inyong kabomberohan sa pag siguro nga luwas ang matag tunghaan sa sunog.Sama sa DepEd, duna usab kami OPLAN BALIK ESKWELA nga ang tuyo ug tumong ang pag-inspeksyon sa mga tunghaan ug mga dormitory nga maoy puy-an sa atong mga estudyante.

Gani dunay kamandoan ang among Regional Director sa Bureau of Fire Protection SR. SUPT. MA. LUISA C. HADJULA, MM  ngadto sa mga city ug municipal fire marshals ug ngadto usab sa mga fire safety inspectors  lukop Central Visayas sa pag-conduct og  building and fire safety inspection sa tanang pribado ug pang publikong tunghaan dinhi sa dakbayan sa Rehiyon 7.

Gihatagan usab og igong pagtagad ang pag-inspeksyon sa mga boarding houses ug dormitoryo diin mao unya ang puy-an sa mga estudyante nga dili taga syudad sa Sugbo. Daghan ang nasita gumikan sa kakuwang niini sa mga fire protective equipments, ang uban walay fire exit ug kun duna man gani naka kandado kini.

Sa kadtong mga establishments nga dunay nakitang violation gihatagan lamang kini og pipila ka adlaw ang mga tag-iya o ba kaha ang nagdumala niini aron makorihian ang mga pagkuwang o violation sa mga lagda sa Fire Code of the Philippines.

Ang maong mga inspeksyon makahatag sa mga ginikanan og kasigurohan sa hunahuna nga luwas  atong mga kabataan sa mga kawatan kini gumikan sa presensya sa atong kapolisan ug sa dihang anaa na sila sa tunghaan makasiguro usab kita nga luwas sa peligro sa sunog ang maong mga tunghaan kay kini na inspeksyon na sa atong kabomberohan.

Hinaut nga ang mga tigduma sa  mga eskwelahan, boarding houses ug dormitory  motuman unta sa mga rekomendasyon nga gilatid sa atong kabomberohan. Ngadto sa tagdumala sa matag boarding house ug dormitory mas labing maayo og  dunay makapaskin nga mga fire safety tips aron sa matag karon ug unya mapahinumduman ang mga estudyante ug mga tigduma sa maong mga edipisyo sa kamahinungdanon sa paglikay ug pag- amping kanunay aron maluwas sa sunog.

Alang sa kompleto nga mga tips duaw kamo sa mga estasyon sa atong kabomberohan nga anaa mahimutang duol sa inyong lugar. Hinaut nga wala unta'y mga kakulian ug aberya sa umaabot nga pagbukas sa School Year 2013-2014.

Lakbit lang ko gamay akong i-greet ug belated happy birthday akong mga kauban sa buhat sila FO1 Walter Gacayan, Mr. Arvin Savello ug advance happy  birthday sa akong youngest daughter nga si Vivienne Dorothy "Yen-yen" Villanueva  karong May 30,2013 puhon. Happy Birthday ninyong tanan!