Pangandoy kong mahimong lector sa misa. Ang una kong giduol ang sekretaryo sa Alliance of Two Hearts Church. Misaad siya nga kun may opening, pahibaw-on ra ko niya pinaagi sa telepono. Suod siyang misis. Busa, nagtuo ko nga sayon da nga makasulod. Apan tulo ka tuig na lang ang nakalabay sa akong pagpinaabot, human sa pagsige ko’g palo-ap, igo ra sa tandotando ug saad ang sekretaryo, ang tanan daw aso...nahanaw human ipadpad sa kalimot.
Nagtuo ko nga ang mga tawo nga nagtrabaho sa simbahan, pulos buotan ug matinud-anon. May bakakon sab diay, no? Kaanugon sa kinasingkasing kong halad nga wala niya hatagi’g gibug-aton.
Sanglit giisnab man ang akong tinguha sa taga Alliance of Two Hearts, misulay ko’g panguhit sa taga Guadalupe Parish Church, nilang: Brod Dindo ug sis Dulce, ang dakodako sa mga lectors. Matud nila, kun gusto gyud kong mag-lector, moapil lang ko sa ilang miting kada-ikaduhang Domingo sa bulan.
Tuod man, sige na ko’g tambong. Sa una kong pagtambong, gipakaingon ko’g puwede na ko. Naunsa ba, nga moingon bitaw na si Msgr. Jose Montecillo (aka: Joemon) nga: “Wala pa ko kaila ninyo mga bag-ong aplikante. Hala, pauli una mo ug sa sunod ninyong anhi dinhi, dad-a ang inyong bio-data ug isumiter ngari nako.â€
Natuman ang pagbuot sa pari. Pag-abot sa sunod nga miting, gitunol ko ngadto kaniya ang akong profile. Gipakapinan pa nako’g kopya sa mga speakers sa 7 Palabras on the Air nga napatik sa Banat News aron paghatag niya’g ideya nga kamao kong mobasa’g mosulti.
Nalipay ko dihang gipakita sa lider sa lector ang sampol sa unsay isul-ob sa usa ka lector panahon sa misa. Giawhag mi niya nga magpatahi na. Haskang lumpayat sa akong kahiladman. “Ayayyy, makasugod na gyud ko!â€
Apan kalit lang miawop ang kahayag sa akong panagway dihang mibaraw si Msgr. Montecillo: “Uy, uy... di puwedeng mag-lector mo dayon. Kinahanglan moagi usa mo og duha ka seminar sama sa Sa-Maria ug Cursillo hangtod mo-graduwar. Kun naa na mo ini, aw anha na nga puwede mong triningon.â€
Ang gihisgotang duha ka seminar ni monsenyor pulos tag-gutlo ka adlaw. Lib-in pa gyud! Conflict sab sa akong trabaho.
Lunes ug Martes ang day-off ko samtang ang seminar magsugod og Miyerkules hangtod sa adlaw’ng Sabado. Lisod pud adyason ang iskedyul sa kauban nako sa work kay pipila kanila mga Tagalog ug di mahimong gub-on ang nakaplano na nilang bakasyon. Mga sirkumstansiya sa dakong pagsulay nga nakaali sa maanindot kong damgo.
“Hala, dili diay sayon ang pagsulod og lector, no?†Tuaw sa akong kahiladman nga bisan diha na ako sa akong higdaanan nagsige’g timbangtimbang hain ang mas bug-at: Ang pagpadayon o ang pag-atras? Nyor Joemon, anaa ra gyud sa imong mga kamot ang tanan.