Maayong lili-on sa kadagkoan sa Liberal Party sa kauluhan ang kagubot sa mga sakop niini diha sa Lapulapu. Ang panagbangi nilang Efrain Pelaez ug Angel Rodriguez kabahin sa nahanaw’ng pundo alang sa kampanya, makadaot sa LP ug kun pasagdan kini, mahimo kining isyu sa 2016 nga eleksiyon batok sa mga kandidato niini.
Kining isyuha kapanaminan sa mga botante. Wala pa gani managpakadaog, nag-ilog na sa paghupot sa pundo sa kampanya.
Ang LP dili angayang tawgon nga Liberal Party diha sa Lapulapu, angay kining tawgon nga “Lukot Party.â€
* * *
Kun dili ilhon sa Smart ug PLDT ang desisyon sa Korte Suprema nga nagpabor sa mga kawani sa Digitel, walay laing makaluluoy kun dili ang mga pordoy’ng mga kawani nga nag-antos sulod sa dugay’ng katuigan sukad sila gipanaktak.
Ang 300 ka mga kawani sa Digitel nagkinahanglan og tabang sa gobyerno aron ilhon ang ilang katungod human midesisyon ang Korte Suprema nga ilegal ang pagtaktak kanila sa Digitel.
Ang Digitel nga gipalit sa Smart ug PLDT gimandoan sa Korte Suprema pagdawat og balik sa trabaho sa mga kawani ug ilhon ang nalatid sa Collective Bargaining Agreement (CBA).
Tingale, dili moila sa katungod sa mga empleyado ang nakapalit sa Digitel tungod kay lahi naman kini nga juridical person.
Maayong hugopan sa mga kahugpongan sa pamuo kining kaso sa 300 ka mga kawani sa Digitel.
Pananglit mapakyas ang atong gobyerno pag-enforce sa kamandoan sa Korte Suprema, mahimo kining sundon sa uban nga mga dagkong kompaniya nga nanaktak og mga empleyado.
Hangtod karon, ang pamuo sa Pilipinas nag-atubang og hulga tungod sa kabulahan ug impluwensiya sa mga kompaniya. Usa pa, ang sektor sa pamuo alkanse kanunay kay wala kini igong salapi nga ikasukol sa management.
Sa mga kaso nga ipasaka, ang abogado nga ma-hire magsalig sa pagdaog sa kaso una kini mabayaran, busa usahay mapilde ang trabahante kun mapalit sa employer ang abogado.
Ning kaso sa Digitel, naguba ang kaugmaon sa mga anak sa mga empleyado. Butang kini nga dili hisabtan sa makapalit ilabi na kun tan-aw nila mahimo lang lupigan ang mga pordoy ug ubos nga mga kawani.
Kanunay, lupigon gani sa PR ang mga mamumuo.