EDITORYAL - Ang hustong hiyas sa trabahante

Pintok  kaayo  ug  prangka  ang  pamahayag  ni  Philip Tan, representante  sa management  o  mga  negosyante, bahin  sa  mga  hiyas  sa  usa  ka  trabahante  nga  maoy ganahan  sa  usa ka  amo.

Sa  usa  ka  AGIO  forum  nga  kauban  ni  Tan  ang  taga DOLE, RTWPB, NMCB ug representante  sa pamuo,  gipadayag  niya  nga  silang  mga  negosyante  wa  mag-agad  nga  mandaran  pa   nga  paumentohan  ang  suhol  sa  mga  mamumuo.

Matud  niya  nga  kun makita  sa  mga negosyante  ang  maayong  abilidad  sa ilang  trabahante, sila  na  mismo  ang  mohagad  niini nga  hatagan  og  suhol  nga  labaw  pa  sa minimum  wage  nga  gitakda  sa balaod.

Kay  alang   sa  negosyante  kanunay  nga  gilantaw  niini  ang  pagsulbong  sa  iyang  negosyo  aron  makatabang  sa pagsaka  usab  sa ekonomiya  sa  nasud.

Tungod  kay  ingon  niini  ang  panglantaw  sa usa  ka negosyante,  gusto  usab  niini  nga  ang iyang  trabahante  makabaton  og  susama  kaniya   og  hunahuna.

Busa  kun  makita  niya  nga   ang iyang  mga  trabahante  makatabang  aron molampos  ang  iyang  negosyo, way katarungan  nga  di  niya  hatagan  og  maayong  suporta  pinaagi  sa suhol  ug  uban  pang  benepisyo  ang  iyang  mamumuo.

Apan   nasayud  siya  nga  lisud  pilion  ang  trabahante  nga  may  maayo  nga kalidad  sama  sa  maayong  abilidad  sa natad  sa trabaho, kugihan  nga  di  na  kinahanglang  mandaran  sa angay  niyang  buhaton, matinud-anon, kapiyalan, di kiriwan, di tabian  ug labaw  sa tanan maayo  makighuyhoy  sa iyang  mga kauban , sa  laktud  maayo  og  kinaiya  ug batasan.

Kay  kun  ang  usa  ka trabahante  kugihan, may  igong  abilidad  sa panarbaho  kay utokan, apan  ang  kinaiya  labaw  pa  sa irong  boang  nga  magpunay  lang  og  panghambat  sa iyang  mga  kauban, di  gihapon  magsilbi.

Ang    trabahante  nga  may   maayong  kinaiya  nunot  sa  iyang  kakugihan  ug  maayong  abilidad  sa   panarbaho,  mao  kini  produktibo  nga  mamumuo  nga  angay   kawilihan  sa  amo.

Ang productivity  di  nimo  makita  sa kawani  nga   magpunay  lang  og  paninghag, pangaway  sa iyang  mga  kauban   kay  mosangpot  kini  sa matag  karon  ug unya  nga  kaguliyang  ug kagubot  sa  trabahoan   nga makapalabad sa ulo sa amo  nga  mosangpot  sa pagkabangkarota sa negosyo.