Reklamo gihapon ni!

Ang gireklamo sa atong magbabasa kabahin sa illegal nga drugas diha sa Pulpogan, Consolacion giaksyonan na sa mga polis. Congrats mga polis!

Dili g’yud hinoon tanang reklamo maaksyonan dayon, apan sagdi lang kay kining atong lindog gisunod kini’g basa sa mga sakop sa intellligence community.

May nagreklamo nga dili man kuno patas ang pagpatuman sa balaud sa mga traffic enforcer sa Mandaue. Kun dunay mosulod nga private vehicles sa one way diha sa Marpa, Mandaue dili man kuno dakpon, ang mga PUJ ra man.

Gireklamo usab kining mga tong kolektors diha sa eskena Florencio, Banilad kay kusog mangayo’g kwarta sa mga drayber bisan og duha ra ang mosakay. Patagmon pa na ninyo nga mga drayber dili mo mohatag, unsaon inyo man ‘sab nga paandon.

Atensyon mga kawani sa DEPW sa dakbayan sa Sugbo, atimana ninyo ang dugay na kaayo nga libaong sa eskena Sikatuna ug Bonifacio padulong sa D. Jakosalem. Unya, kamo sa MCWD, dunay gikawot lagbas sa karsada unahan gamay sa Marco Polo Hotel, kapin na kana sa buwan wala taboni.

Hasol kaayo kay ang mga sakyanan nga moagi mabalda g’yud. Tan-awa kun kinsa ang moatiman ana kay tubo sa tubig man ang maong project nga gilubong lagbas sa karsada.

Ang mga PUJ driver nga mosulod diha sa Park Mall sa Mandaue nangreklamo kay kolektahan sila’g tag P20. Nangutana sila kun illegal ba kini kay wala man kini aprobahi sa City Council nga mag-operate sila’g terminal. Hala, Mandaue aksyoni ninyo ni.

Sa Barangay Masaba, Danao may report nga usa ka Junior ang namaligya’g shabu. Mga polis susiha ninyo ni. Sa Toledo, mora’g grabe g’yud ang shabu kay kanunay ko makadawat og report niini. Palihug, chief aksyoni ning reklamo.

Dunay tanod diha sa Basak-San Nicolas gireklamo nga kanunay’ng magluklok og armas. Tinuod ba ni Ger? Ang multicab nga service sa Balisong, Argao gigamit-gamit ra kuno sa pagpangaligo sa Casay Beach... uy ayaw mo ana.

Unya, dunay mireklamo sa taga Lorega. Nangutana sa kapolisan nganong paspas ang ronda nila batok sa sugal unya nganong walay saturation drive sa mga pushers sa Lorega. Hala, aksyoni kini palihug mga polis.

Apil gani nga gireklamo ang nagkagamay na kaayo nga karsada kay gipasagdan sa mga opisyal ang mga naninda nga mibutang na’g lamesa sa karsada. Aksyoni tawon ni Kapitan Fritz! Kun dili madala nimo, pangayo’g tabang ni Raquel Arce.

Uy, mga polis sa Carcar, sigi man gihapon ni’g operate lagi’g masiao si Dante diha sa Upper Cogon? Aksyoni palihug.

Sa Asturias, ang mga drug users anha kuno magsuyop atbang sa police station, grabeha no? Husto na, hurot atong luna ani da? – Text 09335700853