Ikalipay gyud sa Simbahang Katoliko ang temporary restraining order (TRO) nga giisyu sa Korte Suprema batok sa kamandoan sa Commission on Elections (Comelec) nga ipatangtang ang Team Patay posters sa Simbahang Katoliko.
Walay basehan sa Konstitusyon ug sa mga balaod sa eleksiyon ang kamandoan ni Comelec chairman Sixto Brillantes nga ipatangtang ang mga poster sa Simbahan nga naglista sa mga ngalan sa mga kandidato pagka-senador nga giila niining mga pro-RH ug anti-life.
Naglibog ko kang Brillantes unsay iyang basehan sa iyang paghulga sa mga obispo ug kaparian nga mag-atubang sila og kaso kun dili nila tangtangon ang mga poster.
Gipanalipdan sa Konstitusyon ang tagsatagsa ka katungod sa pagpadayag.
Samtang ang pagkampaya nga gitugot sa balaod adunay duha ka klase – una, mao ang pagkampanya batok sa usa ka kandidato o partido ug ang ikaduha, mao ang pagkampanya pabor sa usa ka kandidato o partido.
Ang gihimo sa Simbahan mao ang pagkampanya batok sa mga kandidato nga mipabor sa Reproductive Health law, nga giisip nilang balaod nga nagpromoter sa abortion, mao nga gihinganlan nila sila og Team Patay.
Misuporta sila sa mga kandidato nga nakigbatok sa RH law tungod kay managsama sila og baruganan sa maong balaod.
Usa sa senatoriable nga nalakip sa Team Buhay mao si Sen. Gringo Honasan kinsa, uban kang Sen. Tito Sotto, nakigbugno sa bul-og batok sa pamunoan ni Pres. Noynoy Aquino nga hugot nga nagduso sa RH law.
Kang Honasan pa, ang ka-sagrado sa kinabuhi nagkinahanglan sa proteksiyon sa gobyerno, dili aksiyon aron makutlo kini pinaagi sa pills, IUD, abortion, condom ug uban pang kontraseptibo.
Alang sa wala pa makaila, ang mga Team Patay senatoriables, sa ato pa, gikampanya sa Simbahan nga dili angay botaran sa Mayo 13, 2013 nga eleksiyon mao sila si Juan Edgardo Angara, Teddy Casiño, Alan Peter Cayetano, Jackie Enrile, Francis Escudero, Risa Hontiveros, ug Loren Legarda.
Ang duha ka party-list nga giila usab nga Team Patay mao ang mga walhon nga mao ang Gabriela, Akbayan, Bayan Muna, ug Anak Pawis.