ARTIKULO: Umento sa plite delikado’g mas dako pa kay sa terminal fee

Bag-o lang gitangtang ni Gob. Gwen Garcia ang P5 nga terminal fee matag pasahero diha sa South Bus Terminal. Nalipay ang mga biyahedor. Apan nagkusmod ang nawong sa mga operator o tag-iya sa mga bus ug mini bus kay didto man nila ihapak ni Gwen ang gitangtang nga P5. Gidoble na ang ilang abangan sa paggamit sa naasoy’ng terminal, diin matud pa sa gobernador, wala’y supak ang mga operator. Dali ra kunong nakatando ang mga negosyante’g sakyanang de pasahero. Diay, may plano na sila unsaon pag-counter sa maong kasabotan aron magpabilin ang dako nilang ganansiya.

Sa kalab-as pa lang sa pagpahunong og P5 passenger’s terminal fee, mialimbukad dayon ang petisyon sa mga operator nga tungod sa kadako sa ilang abangan, patas-an sab nila ang plite sa mga pasahero. Ngiga, sa? Basta negosyante, di gyud palupig! Bisa’g pila pay kantidad, ma-terminal fee man o buhis nga ibungat sa gobiyerno ngadto sa ilang produkto, wa gyu’y problema. Kay ang maong problema adto ra man nila ipasa sa ilang kustomer nga mga pasahero pinaagi sa pagpataas sa plitehan. Ang pangutana, pila man ang ilang ipuno? P1 ba? P2 ba? P5 ba? O, sobra pa? Pagka-delikado baya!!!

Kun tugtan sa mga magbabalaod ang maong yangongo, sama ra nga wala gihapon tangtanga ni Gwen ang passenger’s fee. Bisa’g unsa ka gamay ang ipuno sa plitehan, pareho ra gyud kini nga nagbayad lang gihapon ang mga pasahero sa passenger’s fee. Ang pait ... kun subra pa sa P5 ang ipatong?

Dinhi atong masukod, kun kinsay mas pinangga ni Gov. Gwen Garcia? Ang mga negosyante ba, o mga tawo? Kun ang katawhan maoy mas mahal alang ni Gwen, iya gyung pugngan ang pagpataas sa plitehan. Apan kun dili makapugong si Gwen ning dakong baha sa pagsulay, may ideya na ang mga Sugbuanon kinsa ang angay nilang botohan ning umaabot 2013 nga eleksiyon. — Javier Y. Tapulado, Banawa, Cebu City