Tuig-tuig kon kada tuig ang kagamhanan pinaagi sa Dept. of Health ug sa kapolisan miawhag sa katawhan sa dili pagpataka’g gamit og pabuto atol sa kasaulogan sa Bag-ong Tuig. Ug kun mahimo isalikway na lang ang pabuto ug magtorotot na lang o ba kaha magpatik-patik na lang og lata og takob sa kaldero.
* * *
Apan pipila ra ang maminaw sa maong awhag. Nagpadayon ang pagpabuto atol sa kasaulogan sa pagsud sa Bag-ong Tuig ug ang labing makusog nga pabuto mao gyu’y pilion. Kana bang makaputol gyud og kamot o tiil, makapabuta o makapaguba sa nawong.
* * *
Sa atong pagsulat niining lindog (Dis. 26) naa nay usa ka lalaki didto sa Manila nga naputlan og kamot, anaa say nawad-a’g mga tudlo, ug nabuta gumikan sa ilang pagpabuto og makusog nga pabuto.
* * *
Ang mga taghimo og mga pabuto didto sa Bulacan nagpadayon gayud sa paghimog mga makuyaw nga pabuto bisan pa sa balaud nga nagdili o gidili ang paghimo og mga pabuto nga mahimo nang tawgon nga bomba.
* * *
Nagpadayon ang paghimo sa mga bomba sama sa gitawag nila nga Super Lolo, Goodbye Philippines, Bin Laden, Pla-Pla, End of the World, ug uban pa nga sa ngan lang daan makuyaw nang paminawon.
* * *
Karong bag-o naa nasay bag-ong mga makusog nga pabuto, pipila niini mao ang Gangnam Bomb, Goodbye Bading, Pacquiao Bomb, Goodbye GMA, etc. Kining maong mga makuyaw nga bomba -- diin ang mga ngan dili na rebentador kundili bomba na -- padayon nga gipabrika tungod kay naa man say mamalit niini bisan grabeng mahala.
* * *
Nalupigan na sa merkado ang mga kuwetis, sparklers, binggala ug judas belt. Ang gipangita karon mao kadtong makaputol gyud og kamot ug tiil ug makapabuta.
* * *
TRIVIA. Sa atong mga higalang magbabasa: Wishing you all a happy and accident-free New Year 2013. God bless us all.