Usa kini sa mahinungdanon kaayong butang, nga kinahanglan atong palapdan ang atong panan-aw nga mabag-o ang angay nga himoong estilo sa kinabuhi. Tinguhaon gayud nga masabtan, nga daghang sakit ang mitumaw tungod kay dili maayo o himsog ang estilo sa kinabuhi ang atong gisagop. Kun higpit nato nga sundon ang himsog nga estilo, piho nga malikayan ang daghan nga sakit.
Yano ra kaayo sundon ang pormula: (1)Husto nga pagkaon ug pag-inom. (2) Igo nga ehersisyo. (3) Likayan ang sigarilyo. (4) Kontrol sa bino. (5) Balanse nga pangutok o sikolohiya. Pinaagi niini, malikayan ang gibanabana nga 55% sa hayblad, 75% sa atake sa kasingkasing, 50% sa diabetes ug 35% sa mga tumor, ug mabuhi pa nga di momenus sa 10 ka tuig. Simple ra ang pormula pero nindot kaayo ang resulta nga wa na kinahanglana ang mogasto pa.
Dinhi sa atoa, wa kaayo hatagi og pagpakabana ang mga paagi unsaon nga malikayan ang sakit. Ang gihimo hinoon mao ang pag-andam sa galastohan sa tambal alang sa masakiton. Ang angay unta atimanon ang mga paagi sa paglig-on sa panglawas nga dili masakit. Maayo lagi kun kuwartahan ok lang apan sagad sa atong kaliwat naglisod man. Busa magkat-on ta sa kabililhon sa kahimsog.
Sa laing kanasoran, ilabi na sa WHO ang nagmonitor sa panglawas sa tibuok kalibutan, mihingusog sa kampanya mahitungod sa pagsentro o pagpokus nga matudloan ang katawhan sa mga paagi nga mabatonan ang kahimsog sa panglawas. Kay nadiskubrehan nga kini usa sa hinungdan nga nakapa-ot-ot sa ekonomiya sa matag pamilya, diin apektado usab ang panudlanan sa nasod sa kadako sa badget nga igahin alang sa daghang atimanonon nga masakiton.