Atol sa pagtak-op sa tulo ka semana nga tigom sa Vatican nga gitambongan sa 262 ka obispo sa tibuok kalibotan pagtuki sa labing dagkong krisis sa 2,000 ka tuig nga institusyon, si Santo Papa Benedict XVI kusganong niawhag pagbanhaw sa Kristohanong pagtuo ngadto sa katawhan nga nakalimot ini.
Apan samtang giumol nilang Cebu Archbishop Jose Palma ug ubang mga obispo ang bag-ong mga paagi ug bag-ong mga pung nga mohaom sa nagkalainlaing kultura sa bag-ong pagsangyaw sa mga pagtulon-an sa Simbahang Katoliko, ang eskandalo sa kumbento sa dakbayan sa amihanang Sugbo nakapabisto sa dakong kang-a tali sa sulti ug sa buhat sa kaparian.
* * *
Labihang dakoa sa hawanan sa kumbento, namungingi sa labing mahalon nga mga dayan-dayan, ang naabtan sa usa ka batan-on nga gidapit pagkaon didto human nakatabang sa kalihokan sa parokya. Ang talad kan-anan nahupong sa labing mahalon nga mga plato, kutsara, tinidor, kutsilyo ug mga hapin. Ang higanteng refrigerator nagbusdik sa labing lamian nga mga karne ug mga putahe.
Sud sa kumbento, may laing lamesa nga di sama kapuno sa pagkaon. Para to nilang mga layko. Ang mas hindik nga lamesa alang lang sa kaparian ug labing dagkong haligi sa simbahan. Apan ang mas dakong pagpalabi mabantang sa pagpanambo niya sa bintana sa kumbento nga nag-umbaw sa kabalayan sa mga parokyano.
* * *
Tayaon ug tinapakan nga mga sin ang kasagaran sa mga atop. May pipila ka karaang plastik ug trapal ray gisagang sa init ug uwan. Labing baratuhon ang mga sangkap sa bungbong ug ubang bahin sa kabalayan.
Pagkanaog niya sa kumbento, naagian niya sa ubos ang lungon nga hinimo og nipis nga plywood. Nagpungko ang mga tagtungod sa minatay gawas sa ganghaan sa simbahan, nagpatandang sa naglingiting nga kainit sa udtong tutok. Kay nagpaabot kanus-a maandam ang pari pagbendita sa minatay.
* * *
Sa linghod niyang pangisip, naglisod siya pagtugkad sa kalahi sa pagpuyo sa kaparian ug sa mga parokyano. Nahibaw-an niya nga walo ka milyon ka pesos ang naggasto pagpanindot sa kumbento. Nauwaw siya dihang nakamatngon nga, lahi niya, ang kinabag-an sa mga parokyano di makataak ug labaw nang di makatilaw sa lamiang mga putahe sa kumbento.
Nakahinumdom siya nga sa usa sa mga misa nga gitambongan sa tibuok niyang pamilya nga nagpasalamat ang pari sa mga donasyon nga ilang nadawat alang sa proyekto sa simbahan. Wa na siyang kahinumdom kun para ba sa kumbento o sa mas mapuslanon nga istruktura. Nahasol siya pag-ayo sa kasinatian nga nisumbong gyud siya nako. Mas naalarma siya dihang gisultihan sa akong kabalaka nga ang pagpahimus sa kamanggihatagon sa mga parokyano di monopoliya sa kumbento sa Danao City.
* * *
Email: leo_lastimosa@abs-cbn.com