Nakauyab og marites

Dear Tito Miguel,

Ako diay si Orven , taga Sapangdaku , Cebu City. Akong problema kay mahitungod sa akong girlfriend nga si Kaye nga grabe ka-marites. Pila ka buwan nami nga nag-ipon og puyo. Kun wala siya’y buhaton ilabi na kun day off niya, permi gyud na siya motapok sa among mga silingan, ug magsige og panglibak. Kapila na nako siya gibadlong , pero dili gyud mopatoo.

Makadaghan na nga higayon nga giapas nako siya sa tambayanan sa mga libakera , apan paugat kaayo. Ingnon rako ana niya, mo-extend siya og chika-chika sa mga silingan . Para nako, dili na gyud maayo ang iyang binuhatan kay nasayod ko nga makagaba gyud ang magsige og pamantay sa ubang tawo. Unsaon mani nako akong uyab? — Orven

* * *

Orven,

Lisod usbon. Mao na iyang pagkatawo ug maoy makapalingaw niya. Pero puwede kuhaan gamay. Ingna dili lang siya magabaan, duna pa gyud posibilidad nga siya makasohan. Pero’g dili mahadlok makalaboso, ingna nga kun gusto gyud siya maminaw sa tsismis, itak-om lang niya iyang baba. Dili siya mosumpay, dili mangutana. Igo ra siya maminaw’g mokatawa panagsa.

Ipaamgo kaniya, ang mga marites wala’y pasayloon. Siya nga naminaw sa libak karon, mao na sab sumsoman ini’g talikod niya. Dili sila mga tinuod nga higala. Kalingawan, puwede ra. Apan ang ilang kalipay dunay natumban nga laing tawo. Pero lagmit dili siya matandog niini, kay nalingaw lagi. Tan-awa sab imong kaugalingon, basin dili ka makig-istorya kaniya sulod sa inyong gipuy-an. Mao na nga mogawas siya mangita’g silingan nga ka-istorya. O dili ba kaha lain lain mo’g hilig. Suwayi panagsa nga sakyan nimo iyang kalingawan, programa ba sa TV o sa social media. Kamo duha manan-aw, ipakita nga interesado ka sa iyang gusto. O dili ba kaha mag- exercise mong duha o manglimpyo sa inyong balay.

Barkadaha siya, ingna nga inay sa gawas siya manginhas sa tsismis, kamo na lang duha mag marites. Sigurado pa nga dili mokaylap kun kinsa man inyong gihisgotan.Kun dili gyud siya kapugngan nga mogawas. Bahari, ingna kun manilingan siya, molaag sab ka. Aron mahadlok asa ka. Kun mangutana’g asa ka, ingna kuyog mong duha, aron malayo siya. Kun dili mahadlok, nga iyang ipalabi ang tsismis kaysa nimo, angay na ka magduha duha kun magdayon ba mong duha. —Tito Miguel

Magpatambag ka? Ipada kang Tito Miguel: 0991-318-9366