Nahasol sa  uyab

Dear Tito Miguel ,

Maayong adlaw, ako diay si Franco , taga Poblacion Pardo ,Cebu City. Naproblema ko sa akong uyab nga si  Ashia,  kay bisan unsa na lang ang masulod sa iyang hunahuna. Ana siya nga maabot ra daw ang panahon nga ako siyang buwagan, kay mobalik daw ko sa akong ex-girlfriend . Ambot uy, kun nganong nakaingon siya ana nga wala man unta ko'y gibuhat. Wala sad mi communication sa akong ex-girlfriend.  Naingon niini akong uyab sukad siya nakadungog sa chika sa among friends nga nibalik na daw sa Pilipinas ang akong ex-girlfriend nga nagpuyo sa Amerika sulod sa lima ka tuig. Nagkabuwag mi sa akong ex-girlfriend tungod sa among situwasyon nga lagyo mi sa usa'g-usa. Taud-taod napud nga wala ko'y feelings niya. Akong gihigugma karon kay si Ashia ra gyud. Unsaon mani nako si Ashia  uy? Maghunahuna man og dili mao. —Franco

* * *

Franco,

Na-insecure ug nagselos ra imong uyab. Busa ipasalig nga dili mahitabo iyang gikahadlokan. Mao ra na iya gusto makita’g madunggan, nga hatagan nimo siya’g assurance. Karon kun dili maminaw, sige gihapo’g ingon nga mag-uli mo sa imong ex, pasagdi lang. Ka’y ang selos wala sa rason, naa sa emosyon. Busa wala’y pagpasabot nga mosulod sa iyang utok. Ipakita sa lihok, ayaw siya hatagi’g rason nga magduda’g magselos. Sakyi na lang, buot pasabot gani gihigugma gyud ka niya ka’y hadlok siya mawala ka.  Apan kay lagi iyang gibati naa man sa dughan, lagmit wala’y pasalig kaniya makapahimutang. Dili ang pulong, dili ang lihok. Ang iyang kontra mao ang imahinasyon.

Busa kun moabot sa punto nga ma-irita na ka, ingna kun dili siya moundang, imong tinuod-on iyang duda. Lagmit mahadlok mohilom, apan iya ra nang giluom. Motumaw gihapo’g balik ini’g abot sa panahon. Kun dili gihapon mohilom, ayaw na paminawa. Kun mohisgot sa iyang duda, ayaw’g tubaga. Lakaw palayo kun mahimo. Hangtod nga siya ang maluya.

Posible magpa-victim dayon, dili gyud diay nimo siya hinigugma. Ingna wala’y nawala sa gugma, apan siya wala’y salig sa iyang gihigugma. Mopalayo ug lagmit mawala gyud ka, kun padayon siya sa iyang imahinasyon, iyang mabiyaan ang kamatuoran nga kamo duha ang karon, imong ex nabilin sa kagahapon.  Tito Miguel

Magpatambag ka? Ipada kang Tito Miguel: 0991-318-9366