Human sa ginukdanay sa patrol sa kapulisan ug sa motorsiklo nga gisakyan sa mga notadong tulisan silang Mar ug Jimmy nakorner sila sa usa ka dead end sa sudlunong kalye.
Abtik nga gibiyaan nilang Mar ug Jimmy ang giangkasang motorsiklo ug misibat sa pagdagan. Milanog ang salba sa armas-de-fuego sa naggukod nga mga pulis nga nagpaninggit sa pagpahunong sa duha ka tulisan. Apan maisugon nga mibalos sa pagpabuto si Jimmy sa iyang paltik nga kalibre .45 sa migukod nga mga pulis. Mibadlong kaniya si Mar nga nagkupot usab sa iyang paltik nga kalibre .45!
“Padayon ta sa pagdagan, Jim! Mangita ta’g simbahan...!”
“Ha? S-simbahan? Unsay buot mong ipasabot. Mar...?”
“Mangayo ta’g pasaylo sa Ginoo sa tanan tang mga sala, Jim...!”
“Karon ka pa motuo og Ginoo, Mar? Biyernes Santo ron ug patay ang Ginoo! Wa na tay luna didto sa langit, Mar...!”
Mipaka ang sagunson nga butobuto sa armas-de-fuego gikan sa naggukod nga mga pulis. Milit-ad si Jimmy nga naigo sa bala sa kamatayon. Nahagba kini sa dalan. Nabuhian usab ni Mar ang iyang kalibre .45! Naigo sab siya!
Miping-it si Mar sa kasakit. Apan padayon siya nga midagan. Ug nahiabot gayud siya sa usa ka simbahan sa siyudad ug misulod siya nga wa mamatikdi sa daghang mga tawo nga misaksi sa gipahigayong Siete Palabras sa gawas. Daghang dugo ang miagas sa samad ni Mar. Nagping-it siya sa kasakit nga miluhod atubangan sa altar. Sa nagkahanap niyang panan-aw, gitutokan niya ang dakong rebulto ni Ginoong Hesus nga nagdupa sa krus. Milugwa ang naghingutas nga tingog ni Mar.
“Ginoo, pasayloa ko sa tanang kong mga sala. Hinumdomi ko kon atua na kas Paraiso...!”
Miping-it ug mingislo si Mar. Sa danag niyang kahimatngon, daw misulod sa iyang pandungog ang gipamulong sa rebulto ni Ginoong Hesus kaniya nga misanong sa kinasingkasing niyang paghinulsol sa mga sala.
“Karon dayon, mahiuban ka kanako sa Paraiso...!”
Nahagba nga nagkaub si Mar sa atubangan sa altar sa simbahan, niadtong orasa sa Biyernes Santo. Lorega Proper, Cebu City
(Kataposan)