Dili gyud mopatuo sa mga tambag si Natong sa iyang ginikanan nga sila si Tekya ug Balodoy nga dili magbugalbugal sa mga tawo kay makagaba. Mokatawa lang dayong lakaw sa hantakan. Didto nakigpustaanay siya sa ermetanyo. Ug niantog ang ermentanyo.
Nalipay ang ermentanyo, kay na hari ang tulo ka panalang. Gikuha na ang daog. Apan giwakli ang kamot dalang patid sa tiil sa ermentanyo. Nibahakhak pagkatawa si Natong dalang pagbugalbugal. “Dong, sa imong gibuhat adunay moabot nga trahedya sa imong kinabuhi...!” Human sa mga pulong gikan sa ermentanyo nilakaw lang sab dayon. Pipila ka minutos ang nilabay nipauli si Natong. Unya nasiplatan niya ang gidungog nga pinuy-anan sa mga duwende duol sa iyang gilaktan.
Wala maglangay si Natong gipasipad-an niya pinaagi sa paglabay’g mga bato ang pinuy-anan sa mga duwende. Apan wala kahibalo si Natong nga ang usa ka duwende naigo sa bato. Napisok ang mata, nasuko ang duwende.
Usa ka adlaw niana nanamin si Natong sa dakong samin diin makita niya ang tanan niyang bayhon. Pwerting pamustora ni Natong, kay mangulitawo sa tisay nga dalaga nga si Geraldine. Apan sa tantong tutok sa samin ni Natong nagkaanam og taas ang balhibo hangtod nga nahimong unggoy.
Nibug-at ang ulo ug may sungay na si Natong. Pipila ka gutlo ang nilabay may nisangyad sa iyang luyo, paglingi niya may ikog na ang ulitawo.
Wala sab magdugay may usa ka dilaw nga alindahaw nga nibutho atubangan ni Natong. Nahaigking siya kay nahimong ermentanyo. “Dong, dili lalim nga pasakitan dili ba...?” sa ermentanyo.
“Maluoy ka nako ... pasayloa ko, ermentanyo!” Sa dihang molakang na siya’g usa ka lakang dili na makalakaw si Natong. Unya kalit lang nahanaw ang ermentanyo. Wala palandunga nagkaanam og kangitngit ang iyang panan-aw hangtod nga nahimong buta. Unya may nadungog siyang tingog sa duwende. Nahinumdum si Natong nga iyang gilabay’ng bato ang pinuy-anan sa duwende. (Katapusan)