Gula 92
Gitionan ni SPO1 Nicko Bernal sa iyang kalibre 45 nga pistola ang iyang hepe nga si Chief Inspector Dindo Bernal.
“Wa ko magdahom, sir, nga ikaw ra man diay ang pangulo sa mga Bangkulisan!,” ni Nicko nga misinta sa kasuko.
Wala makatingog ang hepe. Wala kini maglihok sa gibarogan. Wala kini makalihok diha nga giposasan siya ni Nicko. Gikuha niya gikan sa mga kamot niini ang relo nga Rado nga adunay communication gadget. Gidala niya ang hepe paggawas sa CR.
Nakugang ang ubang mga polis pagkakita sa ilang hepe nga gibinaklid pagposas ni Nicko. Gipasabot ni Nicko ang iyang mga kaubang polis.
“Paminaw kamo. Nasakpan nako kining tawhana nga nakigsulti sa iyang mga sakop didto sa CR. Siya diay ang pangulo sa kulto nga maoy responsable sa pagpatay sa mga bata dinhi sa atong lungsod!”
Ang mga polis ingon sa naglisod usab pagtuo sa gisulti ni Nicko. Apan naklaro na ni Nicko ang tanan ug dili na makapangulipas ang hepe niini.
Gibanlod ni Nicko ang hepe sa bilanggoan. “Hayop ka, Hepe! Wala ko magdahom, bisan sa damgo lang, nga ikaw diay ang utok sa nahitabo’ng patay dinhi sa ato. Gipatuyok lang diay nimo ang among mga utok!” matud ni Nicko.
Wala motingog ang hepe. Gibiyaan na lang kini ni Nicko. (Sumpayan)