Gula 12
Tuod, gituman ni Kenn ang giingon ni Ramon nga mohayang siya sa paghigda aron ang atubangan na usab nga bahin sa iyang paa ug bitiis ang masahean sa ulitawo.
Gipugngan pag-ayo ni Ramon ang iyang gibati. Mura’g adunay parte sa iyang lawas nga buot molimbag diha nga nakita niya nga naplastar na ang naghayang nga lawas ni Kenn.
Wala makapugong si Kenn ug mitulon siya’g laway. Panagsa, dili lang g’yud matuyo ni Ramon nga mapasiklapan g’yud niya ang nagbugdo nga bahin sa lawas ni Kenn. Usahay pugson ni Ramon sa pagpiyong ang iyang mga mata.
Takulahaw lang nga gibuhian ni Kenn ang kusog kaayo nga katawa. Kalit nga gibuka ni Ramon ang iyang mga mata ug gitan-aw niya ang panagway ni Kenn. “Gigilokan ka ba Kenn?” matud ni Ramon nga mura’g naigking sa kalit nga pagbahakhak sa dalaga.
“Wala man. Nahakatawa lang ko nga nagtan-aw nimo kay nagpiyong ka man gud nga mura’g adunay dili gusto nga makit-an,” matud ni Kenn nga nagpahiyom. Giangkon ni Ramon nga nagpugong siya sa iyang kaugalingon nga dili matental. Apan gigunitan ni Kenn ang bukton ni Ramon. Mitutok si Ramon kang Kenn kay nahibulong siya ngano nga gigunitan sa dalaga ang iyang kamot. Nagkatagbo ang ilang mga tinan-awan.
Walay tingog nga migawas sa ilang mga baba. Anam-anam nga gibunlot ni Kenn ang bukton ni Ramon sa tumong nga iya kining magakos. “Bugtian ko ang imong pagmasahe nako Mon,” matud ni Kenn. (Sumpayan)