Gula 68
Gipasabot ni SPO1 Nicko Bernal ang babaye nga nagpaila nga lider sa Bangkulis Black Brotherhood nga supak sa kabubut-on sa Dios ang pagpatay nila sa mga bata nga babaye nga natawo sa Septiyembre 8.
“Apan ang inyong diyos dili mao ang among diyos. Ug balaud sa tawo nga inyong gisunod, dili mao ang among balaud. Ug kun mohari na unya sa hingpit ang mga dautan dinhi sa kalibutan, ang amo na nga balaud maoy masunod dinhi sa ibabaw sa yuta,” matud sa babaye.
“Dili kamo magmalampuson sa dautan ninyo nga tumong,” ni Nicko. Mikatawa ang babaye. “Tan-awon ta lang, Nicko, tan-awon ta lang.”
Ug naputol ang linya. Nakapanghupaw si Nicko. Sa matag higayon nga ikasulti niya ang misteryoso nga babaye, gusto siyang molanat og dugay ang ilang panagkabildo. Gusto siyang magpakisayod og maayo niini.
Apan sa laing bahin ingon sa dili siya makatuo nga babaye ang pangulo sa mga Bangkulisan. Bisan sa pangagpas lang, wala gayud siya magdahom nga usa diay ka babaye ang pangulo sa Bangkulis Black Brotherhood.
Nakahatag og dako’ng interes kang Nicko ang kamisteryoso niini. Misamot karon ang iyang kasibot sa pag-ila sa pangulo sa mga Bangkulisan ug sa paglumpag sa maong kulto. – Sumpayan