Ang bomba inigbuto makapatay-og ug makapakurog, molanog ug magdahunog. Apan may bomba’ng makapahinuktok, makapatiurok, ikaw ilansang sa kahingangha ug magsiga na lang ang imong mata.
Usa ka adlaw niana may nag-inusara’ng maanyag nga naghilumhilom. Misulod sa pansayan sa mga lalaki. Dali kini nga gisusi ni Dodong sikyo. Nanuktok siya sa ganghaan, apan wala’y imik ug padayon nga gitak-opan ang pultahan.
Namugos si Dodong sikyo sa pagsulod ug siya natiurok sa iyang nakita, ingon sa dili siya makatutok. Pagsuta niya, misugat sa iyang panan-aw ang makapanlimbawot nga bomba.
“Oy, Dong sikyo, palihug ko og sira. Ay dahhh, naghigot ra ko’s akong hiramenta. Papiitay man gud ang indigay, ang bugdo ipahapsay, ang dagko ipagamay. Hala tutoki, susama na ba kini kang Inday?” ni Charot pa nga misalmot og paguwapahay, indigay sa mga hilaw nga Inday.
“Sus, maayo man gud kaayo ka nga moikid-ikid. Nangalimyon ka sa kahumot. Misulod ka dinhi sa pansayan sa mga lalaki,” pulong ni Dodong Sikyo nga nangutkot sa iyang ulo.
“Hala, tabangi hinuon ko diri og higot ning akong sunoy aron dili makasikad,” dala parayeg nga pulong ni Charot.
“Unswaa!” nagkadusingot si Dodong sikyo. Nasaksihan niya ang bomba nga makalibat sa mata. (Katapusan)