Hamtong na si Loreto, kapin na siya sa 30-anyos, apan wala pa gayud siya magminyo. Daghan na kaayo ang nangutana kaniya kun ngano nga nagpabilin siya nga ulitawo.
Gidudahan na gani si Loreto sa uban nga usa ka bayot kay mura man og dili siya ganahan og babaye. Mura’g nalingaw ra si Loreto sa iyang negosyo nga pagpanimbang og mga scrap nga puthaw. Malambuon man gud kaayo ang iyang negosyo kay pagsugod niya niini mga napulo ka tuig ang milabay, didto ra siya nagpahimutang ilawom sa dako’ng kahoy’ng acasia kilid sa balay sa iyang mga ginikanan.
Karon, miabang na g’yud si Loreto og dako’ng hawan nga gipatukoran niya og mura’g bodega nga pundohanan niya sa mga pinalit nga bisan unsa nga scrap.
Mas mahal ang iyang pagpalit sa mga ibaligya nga scrap mao nga anha magpunsisok kaniya ang mga mamasurahay. Kun panahon sa pasko iya g’yud nga panghatagan og pinaskohan ang mga tigbaligya niya’g scrap.
Usa ka hapon niana, nagsugod na pagpangabot ang mga tigbaligya og scrap. Dunay mga tiguwang na nga nagtulod sa karomata nga miabot ug bag-o pa kini sa panan-aw ni Loreto.
“Karon pa kamo makabaligya dinhi sa akong shop manang?” gisukna niya ang tiguwang. Giingnan siya sa tiguwang nga adunay nakatug-an nga mas mahal ang iyang palit sa puthaw mao nga anha na sila mobaligya kang Loreto.
Nahimo na nga suki ni Loreto ang tiguwang. Nanglabay ang mga adlaw, nahibulong si Loreto kay wala man ang tiguwang-babaye ug lain man ang kauban sa iyang bana nga nagtulod sa karomata.
“Ako kini’ng apo Dong Loreto. Nagpatabang ko pagtulod sa karomata kay gihilantan ang akong asawa,” matud sa tiguwang. Mitutok pag-ayo si Loreto sa hitsuraan nga dalagita. (Sumpayan)