Nagkuyog sila si Roland ug Kenneth paingon sa Cebu City Sports Center. Giingnan ni Kenneth ang bag-o niya’ng higala nga nalipay kaayo siya nga nakasulod sa mao nga lugar kay karon pa siya makatan-aw sa mga dancing contingents sulod sa sports center.
Misamot nga nahinangop kaayo si Kenneth diha nga nanaka sila sa red section nga mga lingkoranan nga nahimutang sa sentro gayud nga bahin ug tataw kaayo sa ilang panan-aw ang stage nga anha manayaw ang mga contingents.
“Mahal ang tiket dinhi no?” gipangutana ni Kenneth si Roland human makasayaw ang contingents sa Carcar. “Igo-igo ra ang presyo. Nindot man ‘sab ang lugar kay nia man ta sa sentro kaayo sa stage,” giingnan ni Roland si Kenneth.
May gikuha si Roland gikan sa back pack. Mga pagkaon ang gihabwa ni Roland gikan sa iyang bag, duna ‘say juice ug canned drinks. “Mangaon ta kay aron dili ta laayan nga maghuwat sa next contingents nga mosayaw,” matud ni Roland.
Nag-uwaw-uwaw pa si Kenneth, wala dayon mokuha sa mga pagkaon nga gibutang ni Roland diha sa kilid sa ilang gilingkoran. Si Roland mismo ang miabli sa canned softdrinks ug gitunol kini ngadto sa dalaga.
“Kasuwerte nako uy nga nagkaila ta Roland kay nakaanhi pa ko sa sports center ug nakapuwesto’g maayo, unya libre pa’g snacks,” matud ni Kenneth. Lingaw kaayo sila si Kenneth ug Roland nga mitan-aw sa mga pasundayag.
Samot sila nga nalingaw diha nga mitikyop na ang kangitngit kay pulos-pulos na nindot ang mihimo og pasundayag. Puwerte’ng nakahugyaw pagsinggit ni Kenneth diha nga mipasundayag na ang mga contingents gikan sa Abuyog, Leyte nga mao ang Buyogan Festival. (Sumpayan)