“Nakadungog man gud ko, Day Jezebel, nga mura’g may gikasulti ka kagabii sa gawas sa atong katulganan. Dili lang nako maklaro ang inyo’ng gipanagsultihan kay dili man ‘sab kaayo kusog ang inyong tingog.
Kun dili pa lang lain ang pamati sa akong lawas kagabii, mogawas unta ko aron magsusi.”
Wala ko motingog apan gipangutana g’yud ko ni Nang Ester.
“Kinsa man tong lalakiha, Day?” Sukit niya nako. “Si Red to, manang,” mitug-an ko sa tinuod.
“Diay ba? Nganong nahiabot man si Red sa servants quarter nga tua ra man duol sa garahe ang iyang kuwarto?”
“Wala man gud kuno siya dukaa’g sayo kagabii maong nagpahangin una siya sa gawas sa garahe. Iya ko’ng nakita nga nagpaingon sa servant’s quarter gikan’g naghilot ni Mrs. Elvira. Iya ko nga giduol ug nakigsulti siya nako.”
“Unsa may inyong gipanagsultihan?” ni nang Ester.
“Um, bisan unsa lang. Bahin sa akong trabaho ug pamilya. Naghisgot sab ‘siya bahin sa iyang pamilya. Kadto pa ang unang higayon nga nagkasulti mi’g maayo si Red. Dugay-dugay g’yud ang among panagsulti, Manang.”
“Angay kang magbantay kang Red, Jezebel.” "Kay ngano man diay, manang Ester?” (Sumpayan)