“Nanawag si Mrs. Elvira sa balay sa iyang igsuon, ang ginikanan sa ig-agaw ni James nga bed ridden. Wala man kuno si James didto,” nagkanayon si Manang Ester.
Wala ko motingog. Sa hilom nakaingon ko nga nagmata lang og morning sila si Manang Ester ug Mrs. Elvira Lim. Wala lang sila’y kasayoran nga nag-uban mi si James sa hotel sa tibuok adlaw.
“Hain man kaha diay si sir James, Manang?” Nag-inartista ko.
“Ambot lagi,” sa lagas pa. “Kaganina rang nangita ang iyang inahan kaniya.”
Naputol ang panagsulti namo ni Manang Ester dihang may sakyanan nga mihunong sa tungod sa gate. Nadungog namo ang sagunson nga pagbosina sa sakyanan.
“Si sir James na tingali ang nahiabot, Day,” matud ni Manang Ester. “Dinhi ka lang kay akong ablihan ang gate.”
“Padayon lang, Manang,” nako pa. “Mosulod na sab ko sa servants quarter kay gikapoy ko sa akong pagsuroysuroy sa siyudad.”
Mibiya si Manang Ester sa akong atubangan. Misulod ko sa servants quarter ug nag-ilis. Pagkahuman, migawas ko sa kuwarto ug miadto sa kusina. Didto na diay si Manang Ester sa kusina. May gikuri-kuri kini. Gitabangan ko siya. -- Sumpayan pa