Gula 6
Dali ra kaayo nga milabay ang mga adlaw, Martes na. Mao na kini ang adlaw nga magdeyt sila si Nick ug Yol uban sa tagsa-tagsa nila ka mga partner nga mga entertainers sa East Paris.
Nagteksanay sila ug nagkasabot nga adto magkita sa SM City. Nagkasabot ang magbarkada nga Yol ug Nick nga magkita sila alas kuwatro sa hapon kay dili mo-duty sa bar ang ilang mga partners.
“Sigurado g’yud nga malingaw ang atong mga partners ani bai Yol,” matud ni Nick diha’ng gitunol niya sa iyang barkada ang tambal nga pangpalakas nga gipalit niya sa botika.
“Imna na’ng duha ka kapsula bai aron nindot og epekto apan unya na kun magkuyog na kamo ug ang imong partner,” gihatagan og ideya ni Nick ang iyang barkada.
Mingisi si Yol nga misud-ong sa tambal nga gihatag sa iyang amigo. “Mao ba kini kadto’ng giingon nimo nga moabot og subra sa tunga sa oras nga walay hunong-hunong ang kumbati bai?” nakapangutana si Yol.
“Mao ni, apan dili kay tunga lang sa oras bai. Sa ikaduha nga hugna sa kumbati, maabtan ka og 45 minutos ug kun sundan pa nimo sa ikatulo, ang problema nimo kun unsaon sa paghuman,” mingisi si Nick.
Iyang gitug-anan si Yol nga sagad na siya nga mogamit niini nga matang sa pangpalakas ug namatud-an na niya ang kaepektibo. “Wala g’yud magmahay ang akong mga partner kun mogamit na ko ani bai. Nagpangita sa akong address pagkahuman,” dugang ni Nick ngadto sa higala. Mora’g naghinam-hinam si Yol nga mogamit sa tambal nga gihatag kaniya sa iyang barkada.
Taud-taud, mitingog na ang message alert sa selpon ni Yol ug sa iyang pagtan-aw si Joan na ang nag-text nga nagpahibalo nga anaa na usab sila sa SM ang kauban niya nga dancer nga partner ni Nick. (Sumpayan)