Gula 3
Wala masayop si Nick, ang babaye nga kauban sa floor manager mao kadto’ng iyang naibgan didto sa gawas. Mitupad dayon ang babaye kang Nick. “Ikaw sir, pagkuha ‘sab og imong partner,” giingnan si Yol sa floor manager.
Mora’g nahagit si Yol mao nga migawas siya didto sa common area ug gipaliraw niya ang iyang mga mata ngadto sa mga babaye nga nanglingkod ug wala’y mga customer.
Adunay babaye nga nagsayaw sa stage. Natural ra hinuon ang pagsayaw niini, dili na g’yud law-ay sama kaniadto. Ang nagsayaw sa stage nagsul-ob og pinakigol kaayo nga short pants nga ang disinyo mora’g may pagka dunot, gision nga nakadugang sa kanindot tan-awon.
Unya, takulahaw lang nga nasangit ang panan-aw ni Yol sa babaye nga bag-ohay pa lang milingkod. Puti kaayo ang mao nga babaye ug may pagka mestiza. Kun guwapa man kadtong napilian ni Nick, tan-aw ni Yol dili usab mabentahaan kini’ng iyang napilian.
“Nakapili ka na sir og imong mapartner?” gisukna si Yol sa floor manager nga kaganina ra nga nagpaniid kaniya nga nagsigi’g tutok sa mga babaye. “Kana’ng ga-red og T-shirt, puwede na?” giingnan ni Yol ang floor manager.
Miyango ang floor manager ug giawhag si Yol nga mouna na lang sa private room. “Nakapili ka na bai?” sukna ni Nick sa higala. Samtang nagpaabot nga muabot ang iyang partner, giliraw ni Yol ang iyang mga mata sa palibot.
Lahi na tuod ang private room kun itandi sa una. Nahinumdom si Yol nga giingnan siya ni Nick nga kaniadto ang pultahan kun isirado wala g’yud makakita kun unsay gihimo sa tua sa sulod.
Karon, may bildo na ang pultahan ug gikan sa gawas masud-ong na ang mga tawo sa sulod. (Sumpayan)