Nagtupad og lingkod sa ilang nataran ang magtiayong Andoy-Lina ning sayong buntag. Nagkinataw-anay sila. May kaistorya sab silang duha ka silingan nga babaye. Silas Nang Ason ug Nang Maria, puro mga biyuda. Nagkapundok sila kay adlaw’ng Domingo ron. Ug bag-o lang silang nauli gikan sa simbahan. Ang ilang nataran nga may diyes metros por diyes metros ang gilapdon, dikit sa karsada sa baryo Pikas, lungsod sa Carmen.
Unya, niagi si Mr. Alindo, usa ka CPA nga nasuod nga higala sa magtiayon. Kay kadaghan makatabang si Mr. Alindo sa mga problema sa papeles sa magtiayon mahitungod sa bayranan sa buhis.
“Pahuway una Mr. Alindo!” sampit ni Andoy.
Taga Poblasyon, Carmen si Mr. Alindo. Tig-hike mabuntag padulong sa amihan sa baryo Puente unya balik sa Poblasyon.
“Maayong buntag ninyo, diha!” ni Mr. Alindo. Nilingi nila. Niurong sa paglakaw. Gitangtang iyang shades sa nawong. Nagpahiyom.
“Sa akong tan-aw, malipayon kaayo mo karong buntaga. Kay nagkinataw-anay mo. Kun sugdan ang buntag og katawa, dunay maayong pagbati sa tibook adlaw. Kay sa panultion pa, Good feelings attract good things” ni Mr. Alindo.
“Hapit una,aron makapahuway” ni Andoy. Nagpahiyom sab.
“Ok ra. Saylo lang una ko” ni Mr. Alindo.
“Di lang gyud ka una mopahuway?” ni Andoy. Naseryoso ang nawong ni Mr. Alindo nga nitutok sa higala. Sa ilang mga hitsura, pareho silang duol na sa sayisinta ang edad.
Hilig sab og pasingot si Andoy. Pero dili hike o jogging iyang buhaton. Duna siya’y umahan sa baryo Kansigiring mga usa ka kilometro gikan sa baryo Pikas. Adto siya didto mangguna. Unya sa palibot sa umahan, daghang kakahoyan. Mangahoy siya. Ug magkalingaw og bugha og kahoy para sugnod, sa iyang nataran. Buntag ug hapon iyang pasingot matag adlaw. Karon, nipahuway kay adlaw’ng Domingo.
“Ang paglakaw, Doy pahuway na man na. Kay ang pagdagan mao gyud ang tinood nga paghago” ni Mr. Alindo. Nisul-ob og balik sa iyang shades ug niisa sa iyang walang kamot agi’g panamilit. Bisa’g tubigtubigan siya, matinagdanon gihapon sa mga ubos kaniya’g kahimtang.
“Na hala, maayong adlaw kanimo” ni Andoy.
“Maayong adlaw sab kaninyong tanan. Nalipay kong magsud-ong nga piskay kanunay inyong panglawas” ni Mr. Alindo. Nilakaw. (Katapusan)