Gula 3
Nakasabot si Larry nga sangko sa langit ang kalipay ni Charisse nga gibayran niya ang iyang obligasyon nga kapin sa dos mil pesos ug bugti niini dili na dad-on sa police station ang dalaga.
“Wala’y problema, naluoy lang ko nimo. Ang imong kaanyag dili angay sa bilanggoan.. angay ka gani nga panggaon,” giingnan ni Larry si Charisse nga napaduko tingali tungod sa kauwaw.
Taud-taud, mibalik na ang usa ka detective nga mibayad sa P2,150 nga usa lang ka chocolate nga gikuha ni Charisse. “Suwerte ka g’yud day nga dia kini si bai Larry nga naluoy nimo. Kon wala pa niya bayari, mapugos man gyud mi pagdala nimo sa police station ug ikiha,” matud sa chief private detective.
Gitunol ni Larry kang Charisse ang chocolate nga porma og triangle ug kapin sa dangaw ang gitas-on. “Ayaw na paghilak Char, kalimti na ang nahitabo ug isipa nga usa lang kadto ka bati nga damgo. Tana, magkuyog na lang ta’g lunch,” agni ni Larry sa dalaga.
“Pagka suwerte nga pagkabata, gibayran ba ang obligasyon, imbitado pa g’yud og paniudto. Sige, kamo lang usa bai Lar kay alas dose pa ang among lunch-break,” matud sa chief private detective nga higala ni Larry.
Misaka sila sa kinatumyan nga andana sa department store nga maoy nahimutangan sa food court. “Sige, pagpili og imong makaon, bisan unsa,” giingnan ni Larry si Charisse nga nakapahiyom pagkadungog.
Samtang sila nag-atubang sa lamesa, gitutokan ni Larry si Charisse. Wala gayud siya masayop nga maanyag kini nga pagka babaye. Human nila og pangaon, miorder pa g’yud og halo-halo si Larry para kanila.
“Busoga na nako sir uy,” ni Charisse. “Ayaw pag sir nako uy, just call me Larry,” ni Larry pa nga nagpahiyom. Nakapahiyom usab si Charisse nga mitutok kang Larry. (Sumpayan)