Linugdangan sa kaisog

Wala’y si bisan kinsa sa mga trabahante ang misanong sa sugo ni Engr. Muana dihang gimandaran niya sila nga ipaputol ang dakong punoan sa dakit nga nagbarog taliwala sa lote nga tukoran nila’g edepisyo. Tanan nahadlok kay taw-an kuno ang maong higanteng kahoy. Base sa nahipos nilang tabi, pulos nangamatay ang tawo nga mihilabot sa maong punoan.

Gumikan niini, naglagot si Engr. Muana sa kataslakan sa ilang sakop. Busa, napugos siya sa pagpakita sa iyang kaisog. Sakay sa modernong kahimanan, siya ang nangunay sa pagpuril sa gikahadlokang dakit. Ug milampos siya sa pagtumba niini sa labihang kasayon. “Isog gyud si Engr. Muana!” Gipakpakan siya sa mga trabahante.

Apan nianang pagka buntag, wala makabangon si Engr. Muana sa iyang gihigdaan. Grabe kaayo ang kasakit sa tiyan nga iyang gibati. Wala siya makasabot unsa kini? Gidala dayon siya sa ospital. Hasta mga doktor naglibog unsang matanga sa sakit kining mitakboy sa isog nga enhinyero. Tanan, nagtuo nga gipanimaslan na si Engr. Muana sa nagpuyo niadtong kahoy nga iyang gipuril. Sa kahadlok nga basi’g madisgraysa ang kinabuhi sa enhinyero. Ora mismo, nakahukom ang ilang labaw nga papaulion na lang dinhi sa Sugbo si Engr. Muana.

Usa ka bulan nga wala na mobalik si Engr. Muana sa ilang trabahoan sa Dumaguete City. Nagtuo ang iyang mga kauban nga wala na siya maluwas. Apan nahingangha ang tanan, dihang may usa ka anino nga kalit lang mipatim-aw sa ilang project site atol sa ilang pagpanihapon -- si Engr. Muana nga daw naglutaw sa hangin nga mipaingon sa ilang nahimutangan. (Kataposan)