Gula 227
Misamot pagdagayday ang mga luha ni sister Veronica samtang namalandong nga andam si Rey sa pagpakamatay tungod kaniya.
Natandog ang iyang balatian. Namatud-an na gayod niya sa hingpit nga hilabihan gayod ang paghigugma ni Rey kaniya nga bisan ang kinabuhi niini wala ikahinugon tungod kaniya. Bisan og may kahiubos kini kaniya apan gipaningkamotan gayod niini ang pagluwas kaniya gikan sa mga kamot sa mga tawong daotan.
Karon misamot ang gibating kahasol ug kabalaka ni sister Veronica. Kun simbako may daotang mahitabo kang Rey gumikan sa pagkagiw niini sa tambalanan bisan wala pa maalim sa hingpit ang mga samad nga nahiagoman niini, dili gayod tingali siya papahulayon sa iyang tanlag.
“Naigking si sister Veronica sa sangpit sa drayber sa taksi. Nahiabot na diay sila sa Orchids Sister’s Convent. Wala siya makaalinggat gumikan sa pagkahiunlod sa iyang hunahuna sa halawom nga paghanduraw. Gidali niya pagpahid sa panyo ang mga luha nga nanulabid sa iyang mga mata. Unya gibayran niya ang drayber sa iyang obligasyon.
Misulod siya sa kombento nga masulob-on kaayo ang panagway. Midiretso siya sa iyang lawak. Gitak-opan niya ang pultahan sa didto na siya sa sulod.
Unya miluhod siya sa atubangan sa gamay’ng altar. Nangamuyo siya. Maduloton nga nag-ampo. Gipangayo niya sa kahitas-an ang kaluwasan ni Rey. -- Sumpayan pa