Gituman ni Emyat ang saad niya sa batang Niño

“Sus, hagba na sab ko da sa ikaduhang higayon sa Teacher’s Board Exam!, unsaon na lang kaha niini nako nga mahimong hingpit nga usa ka maestra?”, nakalitok ning mga pulonga si Emyat samtang nagbasa siya sa peryodiko sa mga palarang nakapasar  usa ka adlaw niana.

Ikaduha na ning higayona nga mikuha siya’g pasulit kon eksamin sa pagkamaestra. “Hagbong na sab ka Emyat sa eksamin pagka maestra?!... Sus maypag maninda ka’g ukay-ukay sa lungsod kay sigurado pang duna kay halin matag adlaw!”, banghag pa sa iyang inahan nga si Talya samtang nagpabuhot sa iyang tinustos nga tabako nga naglingkod dapit sa bintana. “Sige lang god Nay, ana man gyod na ang kinabuhi ... try and try until you succeed!, don’t give up nor surrender!”, tubag ni Emyat ug mipadayon siya, “mokuha ko’g pasulat sa ikatulong higayon ug kun wala gihapoy swerte sundon ko ang imong tambag Nay”.

Gidungog man gyod ang pagkamilagroso sa batang Santo Niño sa Sugbo, modagkot ko Niya ug magpasalamat kun ugaling makapasar nako sa ikatulong higayon,” dugang pa ni Emyat. Mao tong nag self-review na lang siya agi’g pangandam sa ikatulong pagkuha niya og pasulit.

Sa wala pa ang eksaminasyon, nagsige og simba si Emyat sa Basilica del Santo Niño kada adlaw’ng Biyernes sa hapon. Mitulo ang iyang mga luha samtang nag-ampo ug nagluhod siya sulod sa simbahan. Kinasing-kasing gyod ang iyang pag debosyon sa batang Niño.

Paspas ang ligid sa panahon, miabot na gyod ang adlaw sa pasulit  ug sa pagsulat niya sa iyang mga tubag sa mga test questionaire mora lang og gaan kaayo ang iyang pamatyag sa kalawasan kay nanggawas man ang iyang gipang-basa ug gitun-an. “Hala!, apil na ang akong ngalan sa listahan sa mga nakapasar CRISTITA MANALASTAS!, pagka anindot niining balitaa”, nakatuaw si Emyat samtang nagbasa sa peryodiko nga Banat News. Dili matukib ang gibati niyang kalipay lakip na sa iyang mga ginikanan.

“Tinuod gyod diay ang panultihon nga “A winner never quits and a quitter never wins”, pulong dala pahiyom pa ni Emyat ug mipadayon siya,” Labaw sa tanan, sundon ko ug tumanon ang saad ko sa Balaang Bata ... milagroso gyud ang patron sa Sugbo! (Katapusan)