Isla Paraiso

Gula 118

“Kanus-a ka man mogawas sa kombento, sister Veronica?” Misukot ang madre superyor pagkatudtaod.

“Sultihan ko pa si Rey mahitungod niini sa dili pa ko magtakda og adlaw sa pagbiya sa kombento, mother Superior,” laktod nga tubag ni sister Veronica.

Nianang pagkagabii, nahiabot si Rey sa Orchids Sister’s Convent. Nagsul-ob kini sa iyang uniporme sa pagka-polis. Gikan pa si Rey sa ilang buhatan sa presinto 10 ug mihapit kini sa kombento aron pagbisita kang sister Veronica.

Si sister Veronica malipayon nga mitaho ngadto kang Rey sa resulta sa ilang panagsulti sa madre superyor.

“Masinaboton kaayo siya, Rey,” nagkanayon si sister Veronica. “Misanong siya sa dakong pag-uyon sa akong desisyon.”

“Nalipay kaayo ako, sister Veronica,” ni Rey pa, “nga mogawas ka na gyud sa kombento. Ingon sa paghikit-an ang katumanan sa akong mga pangandoy alang kanatong duha.”

“Unsa man diay mga plano mo kun makagawas na ako sa kombento?” pakisayod ni sister Veronica.

“Gusto ko nga mamauli dayon kita sa Bohol,” ni Rey pa. “Buot ko nga magpakasal gilayon kita sa labing daling panahon.” (Sumpayan pa)