Usa ka gabii samtang matulog na unta si Lando, mitingog ang call alert sa iyang selpon. Pagtan-aw ni Lando, iyang nakita nga si Femarie ang nanawag.
Kalit nga miyapa-yapa sa kalipay ang kasing-kasing ni Lando. Gipindot dayon niya ang accept button aron matubag niya ang babaye nga iyang naibgan.
“Hello?†matud ni Lando nga mahinamon kaayo nga nagpaabot sa tingog ni Femarie. Apan wala siya’y nadungog. Gitan-aw ni Lando ang iyang selpon ug nasayran niya nga igo ra diay’ng nag-miss call si Fem.
Gusto unta ni Lando nga tawgon niya si Femarie apan nahuna-huna niya nga agwantahon ang kamingaw. Nakabantay si Lando nga sama kaniya mora’g gimingaw usab si Femarie kaniya tungod sa iyang kabuotan.
Nagpaabot si Lando nga motawag pagbalik si Femarie. Hangtud nga giganoy siya sa katulogon. Pagmata ni Lando pagkabuntag, nakita niya ang upat ka text messages ni Femarie.
Ang text ni Fem mora’g nagtug-an sa iyang kasubo. Nagpasumbingay nga may suod siya nga amigo nga giisip niya nga suod sa iyang dughan nga nakalimot na kaniya.
Nagtug-an usab kini nga daghang mga gabii nga si Femarie walay maayong kinatulgan nga naghuna-huna kun unsay nahimo niya nga kasaypanan.
Pulos pasumbingay ang mga mensahe ni Femarie apan nakasabot si Lando nga ingon sa siya ang gipasabot sa dalaga nga amigo nga nakalimot na kaniya.
Nalooy siya ni Femarie. Giteksan ni Lando ang dalaga. “I miss you so much and I love you.†Gisundan ni Lando og sunod-sunod nga text messages si Fem ug giingnan nga kun may luna siya sa kasing-kasing sa dalaga, magpaabot siya unyang gabii sa usa ka kan-anan sa downtown.
Wala madugay, nakadawat og reply si Lando gikan ni Femarie nga nakapalipay kaayo sa ulitawo. “Sure, its a date. I miss you too,†matud ni Femarie sa mubo niya nga text.
Ingon sa paspas kaayo ang pagtuyok sa panahon. Dali ra kaayo ang pag-abut sa kagabhion nga maoy gikasabotan nila ni Lando ug Fem nga magkita.
Nalantawan ni Lando nga may kahayag na sa iyang tinguha pag-angkon sa gugma sa dalaga. Una nga miabot si Lando sa kan-anan nga ilang gikasabotan.
Wala madugay, nalantawan ni Lando nga misulod na si Fem sa kan-anan ug giliraw ang mga mata pagpangita kaniya. Mitindog si Lando ug gisugat niya ang dalaga.
“Glad to meet you again Fem,†matud ni Lando nga mitutok sa panagway sa dalaga. Mipahiyom si Femarie kang Lando ug gipig-it ang iyang kamot. - Sumpayan