Isla Paraiso

Gula 48

“Sister Veronica!. Milanog na usab ang tingog ni Rey sa kalikopan nga gisapawan sa kinanaas sa makusog nga ulan. “Gimahal ko ikaw, sister Veronica!”

Wala madugay, naabli ang pultahan nga puthaw. Ug mibantang sa panan-aw ni Rey ang matahom nga bayhon ni sister Veronica.

“Rey,” tuaw ni sister Veronica sa kahikugang, “u-unsay gibuhat mo dinhi?”

“Sister Veronica, salamat nga migawas ka,” ni Rey pa. “Gimingaw na kaayo ko nimo.”

“Unya na kita magsulti, Rey,” ni sister Veronica pa. “Manulod kita sa kumbento kay basa ka na kaayo.”

Nanulod sila sa kumbento. Si sister Veronica midali pagsulod sa usa ka lawak. Sa paghibalik niini, nagbitbit na kini og tualya. Iya kining gitunol ngadto kang Rey.

“Trapohi pag-ayo ang imong lawas sa ugang tualya human hukasa ang basa nga sapot nga imong gisul-ob.

Si sister Veronica mibalik pagsulod sa lawak nga iyang gisudlan kaganina. Paggawas niini, may dala na kining t-shirt nga panglalaki.

“Isul-ob kini,” matud sa madre. “Maayo na lang kana kay sa basa ang imong sinena.  Malagmit ka nga magkasakit.”

Wala’y tingogtingog si Rey nga midawat sa t-shirt nga gitunol sa madre. -- Sumpayan pa