Inspirational talk

Ang kahamugaway sa imong kinabuhi dili lang kini makab-ot sa imong pagtungha, kun dili tungod usab kini sa binatid nga trabaho nga imong gi-ugmad.

Mao kini si Lido nga usa  lang ka barbero sa among lungsod sa Intramuros. Ang magtiayon Lido Tasing nakabaton og tulo ka mga anak, usa ka babaye ug duha ka mga lalake. Ug kaluoy sa Diyos silang tulo pulos na mga propesyonal. Si Jenelou usa na ka magtutudlo, samtang si Jaled usa na usab ka Computer engineer ug ang kamanghuran nga si Jian usa na usab ka seaman.

Unsa man ang sekreto ni Lido nga nakapatungha man siya sa iyang mga anak? Una kugihan si Lido, gani bisan sa adlaw’ng Domingo makita si Lido sa iyang barberohan aron pag-atiman sa iyang mga suki. Ikaduha siya maoy labing maayong barber sa among gamay’ng lungsod sa Intramuros.

Daghan siya’g mga suki, mga estudyante, trabahante, empleyado sa gobiyerno, ug bisan ang mga ginikanan paborito si Lido nga maoy motupi sa ilang gagmay’ng mga bata.

Unsa man ang nakatukmod ni Lido nga mahimong usa ka barbero? Tungod kadto sa “inspirational talk” sa mayor sa adlaw sa iyang gradwasyon.

“Mga gradwado, ako nasayud nga pipila ra kaninyo ang makatungha sa kolehiyo. Pipila ra kaninyo ang makatungha tungod sa kalisod sa atong giatubang karon. Apan kumusta ang dili makatungha? Mag-istambay na ba lang? Manguyab unya mag- minyo? Dili, hinoon gidasig ko kamo nga magtuon og binatid nga trabaho. Pananglitan kamong mga babaye pagtuon mo og panahi, masahista, o dili ba panluto.”

“Ug kamong mga lalaki, pagtuon mo nga mamahimong panday, photographer, laminator, welder ug bisan barber ba hinoon. Ug dili lang kay basta-basta sa natad sa inyong trabaho, kun dili himoa ang inyong kaugalingon nga  pinaka maayo tungod kay kun ikaw ang pinaka maayo sama ra nga tua ka sa kapunaw-punawan nga dili ka maabot  sa uban.”

Mao to nga human gyud sa gradwasyon mipauli si Lido sa ilang balay ug iyang gikuot ang gamay’ng tinigom aron ipalit og gunting, sudlay ug kupo. Ug ang iyang tumong nga mamahimong pinakamaayong barbero sa ilang lungsod sa Instramuros, ang iyang tumong natuman.

Gani agi’g pagpangandam sa kasaulugan sa Sentenaryo sa ilang lungsod sa Intramuros, pinangunahan sa ilang mayor, adunay pagpangita sa mga bantugang tawo sa lungsod. Kini naglakip sa natad sa arte, paugnat sa kusog ug sa binatid nga trabaho.

Mabulukon ang kasaulogan. Daghang tawo ang nagtapuk atbang sa Balay Lungsod aron mosaksi kun kinsa ang nahiapil sa mga bantugang tawo sa lungsod.

Ang atong labing bantugang tawo sa atong lungsod sa Intramuros sa natad sa panupi mao si Mr. Lido Bonganciso.”

Human iproklamar sa mayor si Lido misunod dayon ang hugyaw sa katawhan. Lido!! Lido!! Lido!! (Kataposan)