Tungang gabii. Gipukaw si Atty. Ben Hikos sa sugo sa lawas. Kaihion siya. Nihinay siya’g kanaug sa kutson nga katre sa habig sa tuo. Di siya gustong matandog iyang kapikas nga si Karen sa walang habig. Sa dulom nga dan-ag sa lamp shade sa ilang lawak, gihinol ni Ben ang arinola sa sawog dapit sa tiilan sa katre.
Samtang nagbusagak sa arinola ang likido gikan sa lawas niya, nakatimaho si Ben og kandila. Kanang isog nga baho sa aso sa kandila nga bag-o lang gipawong gikang kusog nga nagsiga.
Niliso si Karen. Nakamata. “Wa ka katimaho aron?†ni Karen. “Aso sa kandila?†ni Ben. “Nakatimaho sab diay ka,†ni Karen. “Kinsa kaha rong kalaga nga niduaw nato?’ ni Ben. Nahuman na’g pangihi. Nilakang balik sa katre.
“Ay’g saba oy! Di ka mahadlok? Kun motingog ang kalag? Magpaila kun kinsa siya?â€ni Karen “Wa man tingale angay kahadlokan. Maayo man atong tuyo. Aron makadaginot sa bayranan sa pamisa sa kalag. Kay kun usa ray atong pamisahan, gamay ra ta’g bayranan.
Pagkataudtaud, nawala ang baho sa kandila. Way kala’g nitingog. Nakatulog sila’g balik.
Pagkabuntag,nitambong si Ben sa bista sa iyang kliyente nga gikiha og paanular sa kasal. Ang bana iyang kliyente. Si Dindo. Pag-abot niya sulod sa husgado, gipahibawo na lang siya ni Dante, manghod ni Dindo, nga namatay si Dindo. Na-stroke sa niaging gabii samtang nagtambong og birthday party sa higala. Nahinumdum si Ben sa baho sa kandila.
Gihuwat na lang ni Ben nga tawgon ang kaso. Ug gisabot ni Ben si Atty. Noel Dagas, abogado sa asawa ni Dindo, nga ipa-dismiss na lang ang kaso. Kay igo na ang kamatayon nga makabugto sa kadina sa kaminyoon.
Paggawas ni Ben sa husgado, nidalikyat siya’g sulod sa Basacala Parish. Gipamisahan niya ang kalag sa kliyente. (Kataposan)