Motuo ka’g dili (Matag Domingo) Mangtas nanghasi sa sityo

May  nabalbal na usab sa sityo Buhok-Mais ug kini mao si Calixta nga asawa ni Pabling nga tigtaod og buwang sa tigbakay. Luoy kaayo ang naapil ang iyang gisabak nga lima na ka buwan. Sangko sa langit ang panganti ni Pabling nga siya gyu’y mopatay sa maong mangtas nga ungo.

Nagtuo usab siya nga taga dinhi ra sa sityo buhok-Mais ang mangtas. Unom na ang gipangbalbal sa ungo. May duha ka bata ug upat ka mga hamtong na. Ang ilang kamatayon hilabihan ka makapakitbi sa atay kay nagalhab man ang ilang tiyan ug sulod niini nga mga tinai, atay ug uban pa dad-on man sa mangtas nga ungo.

Karong hapona nia si Pabling sa eskina, sa tindahan ni Uray Sabel nag-inom og bino. Kada-adlaw gyud siya mag-inom tungod sa iyang kaguol sa pagkawala sa iyang minahal sa kinabuhi nga gibalbal sa mangtas nga ungo. Giduol siya ni kapitan Tibong ug may gisulti.

“Ayaw na palabii pag-inom og bino, Bling, kay dili kana unya makabantay inig butho sa ungo ug makatulog ka,” hinay ang tingog sa Kapitan.

“Oo, Kap, ako lang gikalkulo nga dili ko masubrahan. Pinopinohon ko gyud ang mangtas!” unya mikagot ang bag-ang ni Pabling sa kalagot.

Taudtaud miabot si Alicia, ang biyuda nga mamaligyaay og mawos nga ginamos. Daghang nakaayon sa ginamos ni Alicia kay nindot kaayo nga pagka-mawos ug lami kaayong isuwa sa saging kardaba nga linung-ag.

“Bling, tua akong gibilin tong usa ka putos nga ginamos didto sa imong silingan. Hapita lang unya inig pauli nimo...” ni Alicia nga mora’g gibati og kabalaka sa pag-inom ni Pabling. Dili baya ingon niini si Pabling, karon na lang kini mahitabo nga biyudo na siya.

“Salamat, ha, Alicia. Ganahan gyud ko’g mawos nga ginamos. Mogana ang akong kaon labi nag dunay utan. Akong sukaan sa suka sa lubi ug unya akong silian, haaa,” mihanggap og hangin si Pabling.

Igo lang mipahiyom si Alicia. Sa hilom duna siya’y gusto ni Pabling ug dugay na kini dihang buhi pa ang iyang bana. Ug karon nga biyudo na si Pabling, masabot ang mga lihok ni Alicia kay siya man ang mag-ibid-ibid kanunay niini.

Unya wala tuyoang misangpot sa hunahuna ni Pabling nga molahos na lang siya sa balay ni Alicia total kini ra mang usa karon sa iyang balay. May hilom usab siyang kaibog ni Alicia.

“Dayon, Bling,” abi-abi ni Alicia ug nakita ni Pabling nga nagtapis lang kini og toalya.

Midayon si Pabling. Unya ingon sa gilamat siya sa nindot nga lawas ni Alicia. Ug nahitabo gyud ang dili mahitabo, nadimdim nila ang dugos sa gugma. Pagkahuman...

“Bling, ako ang mangtas nga ungo dinhi. Ako ang gibinlan sa akong inahan. Giunay ko’g patay ang akong bana kay may hilom relasyon sa imong asawa. Kadtong bata nga gisabak sa imong asawa dili to imoha. Mga mabudhion sila!”

Misiga ang mga mata ni Alicia.

“Kadtong akong gipangbalbal, kaliwat kadto sa akong bana ug imong asawa. Karon, kita na lang duha ang mag-ipon. Patakdan tika, Bling, aron duha na tang mamalbal...”

Pagkasunod semana nadungog dayon didto sa pikas baryo nga may duha ka mangtas nga nanghasi pagpamalbal. Ug hangtod karon wa pa gyud hisakpi ang duha ka mangtas nga ungo nga sila si Alicia ug ang iyang gipatakdan nga si Pabling. (Kataposan)