Gula 136
Sa higayon nga molakaw si Darwin aron mo-report sa iyang trabaho, iya kong serad-an sa balay. Naneguro kuno siya nga dili ko molayas. Bilanggoon ko niya sulod sa among kuwarto. Pait kaayo ang gidangatan sa akong kinabuhi uban kang Darwin.
Misamot pa gyud ang akong kalbaryo sa dihang may laing babaye nang gikabuangan si Darwin. Wala ko na masinati ang langit nga kanunay nakong maabot bisan dinhi sa ibabaw sa yuta. Wala na nako masinati uban kang Darwin.
Sa gihimo ni Darwin, inanay kong nakaamgo sa sala nga akong nahimo ngadto ni Daniel. Nasuta ko karon nga dili gyud diay lalim ang atong bation kun kita sakiton ug biyaan sa binuhat nga atong gihigugma. Gisakitan ko pag-ayo sa gihimo ni Darwin kanako. Nagmahay ko nga akong giusikan ang kaayo ug kadiyosnon ni Daniel. Pinangga unta ko ni Daniel ug pinangga usab ako ni Walter. Apan wala nako kini ampingi.
Nagpadayon ang kalbaryo sa akong kinabuhi sa kiliran ni Darwin. Pirme ko niyang bun-ogon. Usahay may kauban pa siyang babaye sa among balay nga gipuy-an. Mao nga dihang daw dili na nako maantos, nangita ko’g paagi nga makalayas.
Usa ka higayon niana, dihang nakalakaw na si Darwin paingon sa trabaho, akong gipangtangtang ang jelosy sa among bentana ug didto ko miagi. -- Sumpayan pa