Mga kalag sa purgatoryo

Alas 8:00 sa gabii. Ania na usab atubangan sa altar sa  ilang balay ang pamilyang Sagrado aron mangadye alang sa kalag nilang Tatay Berino, Nanay Pina, Papa Masyong ug Mama Carmen, mga ginikanan sa magtiayong Mendo-Linda. Si Jino, kinsa ikaduhang anak nila ug miyembro sa Karismatik maoy mananabtan nila.

Mikiaykiay ang siga sa mga kandila pagsugod na nila’g pangadye. Ngamig  ang hangin sa kagabhion nga miagi sa binuksang bentana. Napalid ang ilang buhok ug daw gihikap ang mga tingkoy nila sa talagsaong kabugnaw. Wala nila kalikayi ang hinayhinay’ng pagpamangon sa ilang balhibo.

Dihang miabot na sila sa punto nga ang tubag: ‘Kaloy-an mo, Ginoo ang mga kalag sa Purgatoryo’, namatikdan sa mga nanabat nga ingon sa nagkaanam kaubos ang bukton ni Jino samtang nagpadayon sa pagpangadye. Di kay kini lang. Gikang nagluhod, nahapalingkod pa gayod ang ulitawo sa salog. Ngano kaha?

Hinuon, wa kini makabalda sa pag-ampo ni Jino. Mipadayon siya ug mipadayon. Ug ning higayona, gipakusgan pa niya’g samot ang iyang tingog. Nangaliya sa Kahitas-an nga unta kinsa kadtong nangamatay pinaagi sa usa ka hinanaling hitabo ug nga wala makapangandam, pasayloon sa atong Maghuhukom sa ilang mga sala ug luwason gikan sa kalayo sa impiyerno.

Pagkatapos sa pangadye, giduol gilayon sa magtiayong Mendo-Linda ang ilang anak ug gipangutana: “Jin, nganong mora man ka’g naglisod sa pagpanguro’s kaganina? Nganong daw gibug-atan ka man sa  imong mga bukton?”

“Mao lagi, Ma...Pa!” Kalmang tubag sa relihiyosong mananabtan, kinsa may ‘third eye’. “Nahapayaka gyod ko sa sawog tungod sa ilang gihimo. Tiaw bay, ilang gikumpayotan akong mga bukton. Lain pa ang mikabyon sa akong likod ug mitungtong sa akong abaga. Daghan sila, Ma... Pa. Gani, ganina samtang kita nangadye, gialirongan nila atong balay.” Tug-an sa gifted nga batan-on.

“Kinsa bang silaha kanang buot mong ipasabot, Jin?” Nilang Mendo ug Linda nga hapit magkadungan pagsukna.

“Ay’daa, mga unforgotten souls god, Ma, Pa, sa Purgatoriyo.”

“Mao ba?” Nahatutok si Linda sa anak. Si Mendo naisa sab ang kilay. May nahinumdoman sila. Pipila na ka higayon nga gipadamgo sila sa ilang nangamatay nang klasmet ug higala sa hayskol. Dugay na. Apan wala nila kini hatagi’g importansiya. Karon, ning gitug-an ni Jino kanila, nahibalo na sila unsay sunod nilang buhaton? Oo, nakasabot na sila unsa ang mensahe nga gipangayo sa maong mga kalag. (Kataposan)