Ang pagpanglaban, dili lalim. Mao ni ang naamgohan ni Atty. Bart Bulayog. Abi niya’g pagpasar niya sa bar exams, hayahay na siya. Sakripisyo man diay gihapon. Dugang pang sakripisyo. Ang pagtoon sa abogasya ang unang sakripisyo. Kay di man siya kakuha’g bar exams kun di kahuman sa kurso. Sunod nga sakripisyo, ang pag-review para sa bar exams.
Ang pagpanglaban, di na kaayo lisod. Kay sa bar exams, di man siya puwede magdala’g kodego. Pagkatinood, ang pagpanglaban, sama ra gihapon sa pagpamasol. Usahay may kuha. Usahay wala. Usahay gamay’ng isda, usahay dako.
Apan ang pagpangita’g kliyente maoy labing sakripisyo. Kay gidili man sa abogado ang pagpanghagad sa iyang serbisyo. Mao nga ang abogado nga di kaagwanta’g way kita sulod sa pipila ka bulan, manarbaho na lang sa gobyerno o sa mga pribadong buhatan. Kun dili, magnegosyo na lang.
Kay ulitawo pa si Bart, agwanta siya’g patidpatid og lata. Unya takulahaw lang may nasaag nga kliyente sa iyang bupete. Dunay gi-claim nga yuta. Titulado. Gipasakaan dayon ni Bart og kaso. Gitatakan og Notice of Lis Pendens ang titulo.
Dangta’g tuig, naareglo ang kaso. Kay dunay buyer ang yuta. Di mobayad ang buyer kun di una matangtang ang Lis Pendens. Swerte si Bart. 30 milyones ka pesos iyang bahin nga attorney’s fees. Apan usa ra sab ka tuig ang maong salapi. Hurot dayon sa casino ug buwangan. Kay daling niabot ang maong salapi, dali ra sang nibiya. Easy come, easy go.
Karon, ginganlan na si Bart og Attorney Lis Pendens. Kay nakadiskubre og modus sa daling panguwarta. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag)