Gipabatyag ni Lorenz si Joy sa iyang kamapinanggaon. Tuod, daw giganoy si Joy sa langit sa grabeng kalalim nga iyang gibati. “Abi nako og buotan ka lang, romantiko ka man ‘sab diay Lorenz... mabuang ko sa kalalim,†matud ni Joy nga mihiwid-hiwid sa iyang lawas.
Padayong gihapyud-hapyod ni Lorenz ang tiyan ug dughan sa brand new niya’ng girlfriend nga usa ka salesgirl og selpon. Nasigpatan ni Lorenz nga giunay ni Joy pagpaak-paak ang iyang kaugalingong ngabil.
Nasabtan ni Lorenz nga nakabatyag na gayud og grabeng kahinam ang dalaga. Anam-anam niya nga gipaduol ang iyang mga ngabil sa ngabil ni Joy. Nag-ukobay ang ilang mga ngabil. Migakus ang dalaga kang Lorenz.
Gipabatyag ni Lorenz og hugot nga gakus si Joy. “Agoy mabali man ‘sab ang atong kabukogan nimo Lorenz sa kakusog sa imong gakus. Basin og may makakita nato dinhi,†may kabalaka ang tingog ni Joy.
“Mas maayo nga mamalhin ta’g lugar nga walay makakita, ayaw kahadlok,†giingnan ni Lorenz si Joy dungan sa pagtindog. Mitindog usab dayon ang dalaga.
Nanakay sila pagbalik sa awto ug tulin nga mipadagan si Lorenz lugsong gikan sa TOPS paingon sa downtown area. Wala gayud mobalibad si Joy nga gidala siya ni Lorenz sa mabugnaw nga lugar nga sila ra’ng duha.
Gisaw-an nila ang kalipay nga dili matukib sa mga pulong. Diha pa masayri ni Lorenz nga paraygon usab diay kaayo si Joy. Gabii na sila nga migawas sa ilang gisudlan.
Dili ra kay kadto maoy katapusang higayon sa ilang pagtagay sa kalipay. Nasundan pa kini og laing mga higayon.
“Papaulion na ako sa akong mga ginikanan Lorenz. Maayo ra usab para matingob nimo ang imong pagtagad sa imong asawa,†matud ni Joy nga daw kahilakon.
Nakalitan si Lorenz apan wala siya’y nahimo kay mipauli g’yud si Joy sa Bohol. Subo kaayo ang mga adlaw ni Lorenz. Milabay ang mga adlaw, naminaw siya og mga awit sa iyang selpon usa ka gabii niana.
Takulahaw nga gitugtog ang awit ni Claire nga Nakaw na Pag-ibig. Wala tuyoa nga nakahilak si Lorenz nga naminaw kay naigo siya sa kahulogan sa awit.
Wala pa mauli ang iyang asawa nga nagduwa’g mahjong sa silingan. Nabug-os sa huna-huna ni Lorenz nga moapas ni Joy didto sa ilang dapit sa Bohol.
Pagka-ugma, sayo nga milakaw si Lorenz bitbit ang iyang bag nga luhaan ang mga mata. Gilingi niya ang iyang asawa nga natulog pa og gitutokan.
Nasigpatan ni Lorenz ang mahjong set nga gitungtong sa lamesa nga maoy nabuangan sa iyang asawa. Wala pay udto, miabot na sa Jagna si Lorenz ug nagkita na sila si Joy.
“I love you Joy,†ni Lorenz nga migakus sa dalaga. -Kataposan