Sa tinuod lang gisakitan ko sa hilom. Crush man gud nako si Elizar. Ugaling lang kay wala ko niya hatagi’g pagtagad. Mao diay tingali nga wala siya mangulitawo nako kay si Kisaiah man ang iyang nagustohan. Hitsuraan usab si Kisaiah. Apan kun ang ka-sexy sa lawas maoy hisgotan, mas patsada ako’g barog kay kaniya. Kun paguwapahay sab, dili sab ko mabentahaan ni Kisaiah. Daghan ang nag-ingon nga susama kuno ako’g panagway ni Angel Locsin ug may dimples pa. Apan dili nato mapugos kun unsay gusto sa tawo. Duna siya’y katungod sa pagpili. Unsaon ko man nga si Kisaiah man ang nagustohan ni Elizar. Giluom ko na lang ang akong gibati ngadto kang Elizar. Gipasagdan ko sila nga magmalipayon sa ilang relasyon. Pero may mga higayon nga bation nako ang pangabubho kun makita ko sila nga malipayong magkuyog ug magsultihanay.
Apan ang mga panghitabo dili nato matag-an. Paglabay sa mga bulan nasayran ko na lang nga nagkabulag sila si Elizar ug Kisaiah. Dili klaro alang nako ang hinungdan sa ilang panagbulag. Apan ingon sa gikahinangop ko kini sa hilom. Wala ko kasabot sa akong gibati. Nasayran ko kanila ug nalipay pud ko. Nanglabay ang mga adlaw, usa ka adlaw’ng Sabado, dunay gipahigayon nga “disco for a cause†ang among eskuylahan. Ug sa dihang mopauli na ko kay alas dose na man sa tungang gabii. Sa akong paggawas sa gate, misugat nako si Elizar.
“Mopauli ka na, Maria?†Nangutana si Elizar.
Igo ra akong mitan-aw kaniya ug wala ko motingog. Wala ko magdahom ug nakalitan ko sa pangutana ni Elizar maong wala dayon ko makatubag. --Sumpayan pa