Dear Tita Salie,
Maayong adlaw kanimo, Tita, ug komusta? Ako diay si Claire, 18 years old ug 3rd year high school na ako karon. Ang akong problema mahitungod kini sa akong lovelife.
Kining akong boyfriend, Tita, manghod nako og 2 years. Grade 6 pa siya dihang nagkauyab mi. Ug hangtod nga miabot og duha ka tuig kapin ang among relasyon.
Amo lamang gitago ang among relasyon, Tita, tungod kay nasayod mi nga supak niini ang among mga ginikanan tungod kay mga high school pa lamang kaming duha. Duna man god koy health problem ug mao kini ang hinungdan nga naka undang ko sa akong pag-eskuyla. Kun wala pa lang unta ko masakit, Tita, hayan College nako karon.
Medyo naguba ang among relasyon, Tita, tungod kay sa kadugayan nahibaw-an na sa iyang mga ginikanan ang among relasyon. Tungod sa ilang kasuko ngadto sa akong uyab ila kining gibun-og, Tita. Naluoy ko pag-ayo sa akong boyfriend busa ako na lang siyang gibulagan aron dili na siya mag-antos. Apan nisamot ang akong kaguol, Tita, kay perti man hinuon niyang hilak ug dili gyod siya mosugot. Naglibog na hinuon ko karon, Tita, kun unsay akong buhaton. Palihog Pasabta ko. Daghang salamat sa imong pagtagad. God bless.
-- Claire
* * *
Dear Claire.
Sa imong pag-eskuyla ayaw lamang hunahunaa ang imong pangidaron. Padayon sa imong mga tinguha nga molampos sa imong pagtuon kay alang kini sa imong maayong kaugmaon. Paningkamot gyod nga duna kay mahuman nga kurso aron dili na lisod kanimo ang pagpangita og trabaho. Kay nasayod na man kita sa atong kalibotan karon nga mas advantage gyod kun duna kay education. Never mind your age, bahala na kun medyo magulang ka sa imong mga ka-eskuyla. Ang importante nga duna kay ambition sa kinabuhi.
Apan kun mahitungod niining butang sa gugma kinahanglan nimong tan-awon ang inyong pangidaron. Inyong tan-awon nga mga bata pa gyod mong duha alang niining butang sa gugma. Gawas nga mga bata pa mo high school pa lamang ang inyong gi-eskuylahan busa medyo layo-layo pa gyod ang inyong lakton mahitungod sa edukasyon. Mao usab kini ang hinungdan kun nganong kasab-an ang imong boyfriend kun manguyab na siya, kini tungod kay bata pa kaayo siya.
Paningkamot lang una mo sa inyong pagtuon ug ipadaplin lang una ang inyong gugma aron walay esturbo sa inyong pagtuon. Moabot ra unya ang panahon nga pareho na kamong andam, ug I’m sure dili na gyod mo nila pagadid-an.
-- Tita Salie