Dear Tita Salie,
Maayong adlaw kanimo, Tita. I just hope that you are always in good condition and always have the peace of mind. Kanunay gyud ko mobasa sa imong column ang Pasabta. Ganahan kaayo ko sa imong mga tambag. Mao nga gusto ko mangayo sa imong abilidad aron pud ko matabangan niining akong suliran.
By the way, tawga lang ko og “bagetz” from Daanbantayan, Cebu. I am still single, pero karon nia ko sa Minglanilla, Cebu kay diri man ko nakakita og trabaho.
Ang akong problema mahitungod kini sa akong lovelife. Naa koy boyfriend, Tita, ug love kaayo nako siya. Tungod kay layo man ko sa akong pamilya, siya ang akong giisip nga kauban dinhi sa Cebu, kay siya man ang kanunay kong masangpit kun duna koy kinahanglan.
Apan dungan sa pagpanglabay sa mga adlaw, medyo duna koy nadunggan nga mga estorya mahitungod sa akong uyab. Apan ako lang kining gipalabay sa pikas dunggan kay dili ko gusto nga maguba ang among relasyon ug wala na unya koy masangpit kay ako ra man dinhi.
Apan ang maong kamatuoran wala gyud malilong kanako, kay ako mang nahibaw-an nga uyab pud diay sila sa akong amiga. Mao diay nga medyo nausab ang tinagdan sa akong uyab diri kanako. Nakig-estorya ko nila, Tita, og ila gyud nga giangkon nga duna sila’y relasyon. Sakit kaayo, Tita, apan kinahanglan akong dawaton. Unsa may akong buhaton aron ko maka-move on? Wala na ra ba koy laing kaduolan. Palihog Pasabta ko. Thank you so much and God bless.
* * *
Have a nice day,
Sakit gyud ang budhian sa tawo nga maoy atong gisaligan pag-ayo sa atong kinabuhi. Dili kita makatuo nga ila ba diay kining mabuhat kanato bisan pa man sa atong kasuod kanila. Susama sa gibuhat ni Judas ngadto kang Kristo. Kinsay magtuo nga ang iyang mismong apostoles mounay na diay niya pagtugyan ngadto sa mga kamot nga maoy mopatay kaniya.
Ang gibuhat sa imong hinigugma ug sa imong amiga lisod kaayong sabton kun nganong nabuhat nila kini kanimo. Unsay imong nabuhat nga sala ngadto kanila nga ila man kang gipasakitan. Yes, lisod kaayong sabton apan kaya nilang buhaton. Tingali duna usab sila’y pagbati sa usa’g-usa busa nagkasinabot sila. Busa ang imo lamang buhaton mao ang pagdawat sa ilang desisyon. Pasagdi na lang sila ug ayaw na hunahunaa aron dili ka magmagul-anon sa imong kinabuhi.
Padayon sa imong pagtrabaho ug pagpaningkamot sa kinabuhi. Ayaw paabota tungod kay muabot ra kanimo ang tawo o mga tawo nga tinuoray nga mahigugma kanimo, muila kanimo isip higala ug muamping sa imong kasingkasing aron dili ka masakitan.
Ayaw kaguol kay ang kamatuoran sa kinabuhi, is just a “matter of ups and down”. Kun karon naa ka sa ilawom, ugma sa ibabaw na pud ka. -- Tita Salie