Gipisil dayon ni Oscar ang tampihak ni Divina. “Nindot kaayo ang akong pamati Oscar nga imong gipisil ang akong ulo. Pasensya na kay mora g’yud ko og nahubog sa akong nainom,” ni Divina pa.
Human og pisil ni Oscar sa ulo sa dalaga, nananghid na si Oscar nga mopauli. “Thanks kaayo sa pagdawat nimo sa akong gugma Div, mobalik ko ugma kay isuroy tika tibuok adlaw,” matud ni Oscar.
Wala dayon motubag si Divina. Taud-taud. “Hain ang maayo kun anhi ka na lang mohigda Oscar para may kauban ko.” Wala makatoo si Oscar sa iyang nadungog nga gidapit siya ni Divina nga adto na lang matulog sa kwarto uban kaniya.
“Sige, daku kaayo ko nga sugot nga anhi matulog uban nimo, labi na og magtupad ta og higda sa higdaanan,” dalang komedya ni Oscar. Nasabot niya nga dili mobalibad si Divina nga magtupad sila’g higda kay wala kini modumili.
Mihigda dayon si Oscar tupad ni Divina. Gigakos niya ang dalaga nga wala gayud mobadlong sa iyang gihimo. Nalantawan na ni Oscar ang sunod nga mga panghitabo. Mitindog si Oscar ug gipalong ang suga nga diha sa ibabaw sa ilang gihigdaan.
Kalit lang mingiob ang kwarto apan may gamay’ng kahayag gihapon nga nakadan-ag gikan sa suga didto sa banyo. Mihigda si Oscar pagbalik tupad ni Divina ug subli niya kini nga gigakus ang dalaga.
Iya kini nga gihagkan. Wala niya palandunga nga misukol kaniya og parayganay si Divina. Nagkainit ang ilang pagparayganay. “Matulog ka lang ba nga magkarsones?” giingnan ni Oscar ang iyang girlfriend.
“Hibalo na ko kun nganong nangutana ka Oscar. Sige gud, ako ning hukason para sayon ra ang paglihok-lihok” ni Divina pa. Subli sila nga nagparayganay. Nahitabo gyud silang duha sa maong higayon.
Daw dili makatoo si Oscar nga moabut kining maong higayon. Human sa makapoy nilang kumbati sa kama, pareho sila nga nakatulog. Pagkabuntag, pagmata ni Oscar wala si Divina sa kwarto. Gikuyawan siya, apan diha pa ang bag sa dalaga.
Gisul-ob ni Oscar ang iyang mga sapot ug migawas siya sa kwarto. Nalantawan dayon niya si Divina nga nagtindog sa paseyo sa lodging house nga naglantaw sa unahan. Giduol ni Oscar ang dalaga ug giagbayan.
“Unsay imong gihinuktokan Div?” ni Oscar pa nga nakapakurat sa dalaga. “Nahimo ko nga barato nga pagkababaye Oscar. Gitugyan nako ang akong kaugalingon nimo sa tumang kasayon. Ang tinuod, may boyfriend na ako sa Surigao ug kaslonon na kami unya sa Pebrero 14,” ni Divina pa.
Nasabtan ni Oscar ang gibati ni Divina. Gusto pa unta nga morebansin si Oscar apan wala niya kini himoa. Nanuroy sila sa SM ug pagkahapon, gihatud niya si Divina sa barko nga mitapos sa 24-oras nila nga kaagi. (Kataposan)