Gula 42
Dili lang si Tinley ang kustomer nga gidala nako sa akong gipuy-an. Sa misunod pang gabii, dinha pay daghang mga kustomer nga dili makaabot sa presyo sa mga babaye nga akong gibugawan. Mao nga ako na lang ang ilang daginuton.
Sanglit daginuton na man sab lagi ang ilang kuwarta, dili na lang mi mag-motel. Dad-on nako ang akong kustomer sa balay nga akong gipuy-an. Adto nako ihatag ang serbisyo nga ilang gipangayo.
Usa ka gabii niana, gipangdakop ang mga babayeng nagbaligya sa unod sa mga tinugyanan sa balaod. Maayo gani kay nakasibat ko dayon ug wala mahiapil sa dakop. Si Eva hinuon nalakip sa nadakpan.
Paglabay sa pipila ka adlaw, miadto ko sa among istambayanan sa downtown aron pagbugaw sa mga langgam sa kagabhion. Gisuginlan ko ni Eva nga nangita na kanako ang mga suki nakong kustomer. Giagni ko ni Eva nga mobalik na sa trabaho kay wala nay dakop nga ipahigayon ang kapolisan.
Gipalabay pa gayod nako ang laing usa ka semana una ko mobalik sa downtown. Naneguro ko. Dili ko gustong madakpan.
Nalipay ang mga suki kong kustomer sa akong pagbalik. Nalipay usab ang mga babaye nga akong gibugawan kay dali ra silang mahalin kun akoy mo-deal kanila sanglit daghan man lagi ako’g kaila.
Usa ka gabii niana, nagkita kami si Tinley sa downtown sa siyudad. Miduol dayon siya sa akong nahimutangan ug nakigsulti kanako. -- Sumpayan pa