Pagbudhi sa nasud

Sa kadaghan sa mga rason pagpasabot sa Malacañang ug pagsupak sa kampo sa mga Duterte sa pagkatangtang nilang Bise Presidente Sara Duterte ug kanhi presidente Rodrigo Duterte gikan sa National Security Council (NSC), walay naghisgot sa elepante sa kontrobersiya --ang China.

Hagbay rang nabisto ang managlahi nga baruganan sa administrasyon ni Presidente Ferdinand Marcos Jr. ug sa mga Duterte sa bangis nga mga pagpanghasi sa China sa West Philippine Sea (WPS): Si Marcos nagpalaban sa Estados Unidos pagbadlong sa pangilog sa China; samtang ang mga Duterte niawhag nga paundayonan ang China.

* * *

Duhay rason sa Malacañang sa pagkatangtang sa mga Duterte: May gahom ni Marcos Jr., sama sa nangaging mga presidente, sa paglahugay sa NSC; ug walay labot ang bise presidente sa mga tigom sa NSC. Ambot nganong wala nila iapil ang iyang pagpakahilom sa WPS.

Nipasangil si kanhi presidential legal counsel Salvador Panelo nga ang lahugay sa NSC gitumong sa pagpa-awop sa politikanhong bituon sa mga Duterte. Wala motuki sa ka-bakikaw nga pa-apilon sa pagtuki sa epektibong mga paagi pagpanalipod sa WPS ang mga Duterte nga tua kapusta sa China.

* * *

Bisan kon ang makabungog nga mayoriya sa katawhan nipadayag og kasuko batok sa ka-agresibo sa China sa WPS, wala pang kakita og paagi ang administrasyon unsaon paglambigit ang mga Duterte sa giisip nga labing seryusong hulga sa nasudnong seguridad.

Kutob ra sa pasumbingay ang mga tagdumala sa nasudnong seguridad. Ambot nanagana ba lang tungod sa popularidad sa mga Duterte, walay opisyal nga nangahas pagpasangil sa mga Duterte sa pagbudhi sa nasud.

* * *

Walay panagana ang trolls sa mga Duterte sa paglibog sa katawhan pinaagi sa pagpakatap og mga bakak sa WPS:

•Niinsistir sila nga ang China maoy tinuod nga tag-iya sa WPS maong dili na angayng mosukol ang Pilipinas;

•Nipasidaan sab nga walay dag-anan ang Pilipinas sa mga armas nukleyar nga posibleng gamiton sa China kon moulbo ang gubat sa WPS;

•Gipasanginlan nila si Marcos Jr. sa iresponsable nga pagsugod sa kaguliyang sa WPS; ug

•Giawhag ang mga sakop sa Armed Forces of the Philippines sa dili pagsugot nga pangulohan sila sa gubat sa commander in chief nga ilang gipasanginlang adik sa cocaine.