Daghan ang makatubig

Ang taga Barangay Pulangbato ug ubang kasikbit nga barangay sa bukid, makatubig na gyud pinaagi sa water expansion project sa Metro Cebu Water District (MCWD) diha sa kabukirang barangay.

Nakapaagas na ang MCWD sa ilang linya nga nahimutang sa sudlonon nga bahin sa Barangay Pulangbato, ug sa Barangay Lusaran. Mosunod na usab sa dili madugay ang sa ubang barangay sa bukid.

Diri sa ibabaw nga bahin sa Barangay Apas, Cebu City, nagpadayon pa sa paglubong og mga dagkong tubo sa tubig ang kontraktor sa MCWD, ug gipaanbot nga mahuman kini sa sayong bahin sunod tuig.

Si Atty. Joey Daluz III, kanhi chairman sa MCWD, gihangop pag-ayo sa mga lumolupyo sa kabukiran kay atol sa iyang pagdumala sa MCWD nga napirmahan ang kontrata uban sa JE Hydro & Bio-Energy Corporation.

Ang JE Hydro maoy gitahasan pagmugna og dakong planta nga molimpyo sa tubig nga gikan sa dakong sapa sa Barangay Lusaran, ug ang limpyo na nga tubig, gisuplay niini ngadto sa MCWD.

Gisulbad gyud ni Daluz ug sa mga sakop sa MCWD Board ang problema sa mga lumolupyo sa bukirang barangay kabahin sa tubig, kay pwede ra baya unta nga ang mga dagkong tubo sa tubig gikan sa Lusaran anha nila ikonektar sa linya sa MCWD sa Talamban.

Apan kon diha ra sa Talamban ikonektar ang linya sa tubig, ang taga Barangay Pit-os, Bacayan, Paril, Pulambato, Nasipit, Busay, ug Upper Apas dili gyud makatubig.

Ako personal gyud nga magpasalamat kang Atty. Daluz kay usa ko sa nakabenepisyo sa tubig gikan sa Barangay Lusaran. Apil nga akong gipasalamatan mao si Engr. Joffrey Hapitan nga maoy chairman sa JE Hydro tungod sa malampuson niyang proyekto.

Angay usab nga pasalamatan sa katawhan si Mayor Raymond Alvin Garcia kay siya maoy mipirma sa permit sa unom ka kontraktor sa MCWD nga gipaabog-abogan lang opisina sa kanhi nagdumala sa siyudad.

Busa kamong mga lumolupyo sa bukirang barangay nga akong gihisgotan ug wa pay koneksyon sa tubig gikan sa MCWD, ayaw paglangay, apply na og water connection.

* * *

Problemado gyud kaayo karon si dismissed Mayor Jonas Cortes kay mihukom na ang Comelec nga kanselahon ang iyang pagka kandidato. Nagpasabot nga dili na iapil ang iyang nga’n sa pag-imprinta sa mga balota.

Matud sa Comelec nga nasuta gyud nila nga nakahimo og sayop si Cortes kay wa man niya itug-an nga nag-atubang siya’g mga kaso ug gani ang Ombudsman mipahamtang na niya’g silot.

Hinuon, matud ni Cortes nga himoon niya ang tanang paagi subay sa balaod aron nga dili mapatuman ang hukom sa Comelec. Nagpasabot nga modangop siya sa labaw’ng hukmanan.