Hungaw nga depensa
Nipahibawo ang kampo ni Bise Presidente Sara Duterte nga walo ngadto sa napulo ka saksi ang ipresentar sa dili pa motapos sa ilang depensa sa impeachment trial. Naglaom si Atty. Michael Poa, tigpamaba ni VP Sara, nga matapos na ang ilang presentasyon karong semanaha. Sa dili pa maputol ang husay kay tukion na sa plenaryo sa Senado ang kontrobersiyal nga 2027 budget sugod sa Lunes.
Nagpasabot ba kini nga mahuman na ang husay karong buwana? Ug nga mahimo nga hukman na sa senator judges si VP Sara sa sunod buwan?
Upat ra ka testigo ang gipa-supina sa depensa para sa husay karon ug ugmang adlawa: Usa ka kanhi imbestigador sa Anti-Money Laundering Council ug tulo ka opisyal sa gobyerno nga momatuod nga rehistrado ang negosyo sa banana chips sa Cale88 Foods Corporation, ang kompaniya ni Atty. Mans Carpio nga nakadawat og P319 milyones gikan sa mainland China ug Hong Kong.
Walay bisan usa nila nga gitanyag sa depensa pagtubag sa pasangil nga P818 milyones ngadto sa P1.5 bilyones ang hidden wealth ni VP Sara ug sa iyang bana.
Kon dili hatagan og importansiya sa prosekusyon ang mga saksi, kay dili man makatandog sa kinakusgan nilang mga ebidensiya batok ni VP Sara, mahimo mubo ra ang cross examination. Mahimo gani nga dili na lang mangutana aron kalikayan ang pag-usik-usik sa dugang panahon.
Sa ato pa, posibleng mahuman ang mga testimoniya sa nahibilin nga mga saksi sa depensa karong adlawa. Ug makanselar na sang husay ugma. Gawas lang kon mopakurat og testify silang VP Sara ug Mans.
Gawas lang kon gi-reserba ni VP Sara ang kinakusgang saksi ug ebidensiya aron dili makaandam ang prosekusyon sa kataposang gutlo (kay mahimong paluagan ni Presiding Officer Chiz Escudero ang lagda sa lima ka adlaw nga notisya sa dili pa ang testimoniya), kon dili mabawi ang nagkatuiris nga sulti sa ilang mga saksi sa niaging semana, hungaw ang depensa ni VP Sara.
Kayamukat diay ang Binisaya sa bloodbath nga iyang gipasidaan. Tinuod diay ang duda sa prosekusyon nga walay mga saksi ug dokumento nga manalipod niya. Sa walay kibutoban nga objections ug technicalities ra gyod diay sila kutob.
- Latest



















