Paggamit sa Development Fund sa Bantayan mikabat lang sa 28.19%

CEBU, Philippines — Mikabat lang sa 28.19 porsyento ang paggamit sa Munisipyo sa Bantayan, Cebu sa 20% Development Fund niadtong 2025, diin ?53.49 milyon ang wala magamit ug nakaapekto sa tukmang panahon nga pagpatuman sa pipila ka mga proyekto.

Matud sa COA, nag gahin ang munisipyo og ?74.49 milyon alang sa 20% Development Fund apan ?21 milyon lamang niini ang nagamit. Mas ubos kini kumpara sa 49.68 porsyentong utilization rate niadtong 2024, diin ?27.94 milyon sa ?56.25 milyon nga gigahin ang nagamit, samtang ?28.31 milyon ang wala magasto.

Matud sa COA, ang langay nga pagpatuman sa mga proyekto ug ubos nga paggamit sa pondo nakapugong sa mga residente sa Bantayan nga makadawat dayon sa mga benepisyo sa importanteng mga proyekto sa kalamboan.

Nalangan usab ang mga proyekto sa mga island barangay tungod sa mga problema sa pag-deliver sa mga materyales. Nakatampo usab sa kalangan ang election ban niadtong 2025 ug ang sunod nga transisyon ngadto sa bag-ong administrasyon, sumala sa Municipal Engineer ug chairperson sa Bids and Awards Committee.

Girekomenda sa COA sa munisipyo nga mas mapadako ang paggamit sa 20% Development Fund, palig-onon ang project planning ug siguruhon nga andam na alang sa procurement ug pagpatuman ang mga proyekto sa dili pa kini iapil sa Annual Investment Program. (BANAT NEWS)