Mga public beaches, resorts monitoron
CEBU, Philippines — Nangandam ang Siyudad sa Lapu-Lapu sa mga kalihokan sa mga simbahan sa kabarangayan tungod sa Semana Santa ilabi na sa mga kalihokan Biyernes Santo, Sabado De Gloria ug hangtod na sa Pasko sa Pagkabanhaw sa adlaw nga Domingo ilabi na atol sa gitawag nga “Gisong.”
Si Police Lieutenant Christian Torres, tigpamaba sa LCPO miingon nga gipaabot sab nilang modagsa ang mga mangaligo og dagat sa nagkadaiyang beach resorts sa dakbayan.
Nahimo na kining tradisyon sa mga tawo nga mangaligo og dagat tibuok pamilya ini og adlaw sa Pasko sa Pagkabanhaw. Dili kalikayan nga magdasok ang mga tawo sa mga public beaches ug usahay dili na tanan mabantayan.
Sa Siyudad sa Mandaue, si Atty. Jamaal James Calipayan, City Administrator miingon nga bisan kun walay trabaho sa maong mga adlaw apan ang mga buhatan nga naglambigit sa pagmonitor sa mga nagkadaiyang kalihokan ang magpabilin naka-duty.
Sa Easter Sunday o Pasko sa Pagkabanhaw , gipaabot nga daghang mangaligo sa Pajara o sa ilawom nga bahin sa Marcelo Fernan Bridge sa Barangay Umapad mao nga ilaha sab kining bantayan.
Sa laing bahin, wala gidili sa simbahang Romano Katoliko ang magpenetensya karong Semana Santa para sa mga relihiyoso ug debotong magtutuo.
Apan si Dr. Rey Cesar Bautista, pangu sa City Health Office sa Talisay ang nipahinumdom nga dili lang maayong pasobrahan nga mabutang sa peligro ang kinabuhi.
Sama anang magpabuwad sa init, magpakulata o magpabunal sa uban agi og pagsilot sa kaugalingon dalang paghinulsol sa mga nabuhat nga sala.
Nagkanayon si Bautista nga dili tiaw ang kainiton karong panahona busa kinahanglang magsuot gyud og proteksyon sa kaugalingon ug moinum og daghang tubig kung di man kalikayan nga mabuwad sa init.
Likayan sa mga senior citizen, Person’s With Disability (PWD) ug adunay gipamati sa kalawasan ang pagpabuwad sa init karong panahona.
Nitambag si Bautista nga kung molakaw man gani anhi na sa alas 3 o alas 4 sa hapon nga molurang na ang grabe nga kainit. (BANAT NEWS)
- Latest
